La naziunala svizra manchenta be per pauc la sensaziun. En il quartfinal encunter l'Engalterra sto suenter il 1:1 la lutga da penaltis decider. Quella gudognan la finala ils Three Lions cun 5:3. Sco avant 3 onns, cura che la Svizra è stada l'emprima giada en il quartfinal ad in campiunadi europeic, han puspè ils penaltis stuì decider davart restar u turnar. En la 75avla minuta aveva Breel Embolo sajettà la Svizra en avantatg cun 1:0. La Svizra ha pudÌ semiar 5 minutas. En il tableau virtual è ella stada 5 minutas en il mezfinal. Ina mar cotschna cun cruschs svizras ha giubilà en il stadion a Düsseldorf. Ma ils Englais èn grazia al gol da Bukayo Saka en la 80avla minuta sa salvads en la prolungaziun.
Cun il defensur Manuel Akanji èsi gist il meglier giugadur durant l'entir turnier, che na fa betg il penalti – Goli Jordan Pickford tegn. Cunquai che Yann Sommer na vegn da tegnair nagin penalti dals Englais stat la Svizra – sco l'onn 2021 – puspè fitgada en il quartfinal dad in'Euro e sto turnar a chasa. Las quatter equipas che restan pon anc cumbatter per il titel ed il pocal. Quai èn l'Engalterra, la Spagna, la Frantscha ed ils Pajais Bass.
Guardar – tremblar – sperar – giubilar - consolar da cuminanza
Durant gronds turnier da ballape sco l'Euro sa radunan fans in pau dapertut per guardar ensemen ils gieus. Ballapè unescha grond e pign, giuven e vegl, experts ed amaturs – uschia era sisum la Surselva. En la halla veglia da la scola ha il club da ballape Sedrun/Mustér installà in public viewing. Transfurmà quest lieu cun bler amur per detagls en in'arena da ballape. Cun visur gigantic, televisiuns pli pitschnas, ina tribuna, bar. In maun creativ era cun decorar ed illuminar quest public viewing che derasa ina atmosfera simpatica e carmala numerus visitaders che han tschaffen da quella purschida. Surtut durant ils gieus da la Svizra èn ils fans vegni en rotschas.
Manchentà ina schanza – i fa mal
Cun bler optimissem èn las 250 persunas arrivadas la sonda saira en il public viewing a Sedrun. Il plaschair enorm che la Svizra è anc adina en il turnier e tranter las ultimas 8 naziuns che pon anc cumbatter per il titel. Ils blers tippan sin ina victoria, gugent en il temp regular, encunter ils Englais. La tensiun e la gnervusadad palpabla, cura ch'i va en la lutga da penaltis. Dischillusiun sa derasa, cura ch'ils Englais pon giubilar ed ils Svizzers ston sa consolar. Era ils cors dils fans sa radunads a Sedrun fan mal. Vegnir eliminads dal turnier entras la lutga da penaltis è brutal.
Ina bell'aventura fin il quartfinal
La naziunala svizra da ballape procura per euforia e lascha sperar e siemiar in'entira naziun ch'insatge grond è pussaivel. Sin sia via en il quartfinal ha la truppa dal trenader Murat Yakin persvadì cun tactica ed effizienza encunter grondas naziuns dal ballape. Cun il pari dad 1:1 encunter la Germania e la victoria istorica da 2:0 encunter l'Italia ch'è sa blamada. Il defensur dal titel è vegnì terrà ed è restà senza la minima schanza encunter la Svizra. Co è quest success da declerar? Suenter ils schampers gieus da qualificaziun l'atun. Lura ha pauc funcziunà e blers han dà pauc credit a la Naziunala svizra ch'ella avanzia lunsch al campiunadi europeic en Germania.
Las trumpadas e las surpraisas
L'Engalterra è segir l'equipa che n'ha absolutamain betg persvadì e stat tuttina en il quartfinal. Encunter la Slovachia eran las valischas gia tant sco pachetadas, cura che Jude Bellingham spendra il pajas mamma dal ballape en la prolungaziun, nua che Harry Kane sajetta il gol da la victoria. Senza plan, senza inspiraziun, senza propi avair giugà ballape restan ils «Three Lions» en il turnier. A chasa, vi sin l'insla, datti ferma critica per lur minimalissem. Ins è trumpà da l'atgna equipa. Surtut dal trenader Gareth Southgate e ses betg agir che nagin na chapescha.
Cun minimalissem ha era la Frantscha cuntanschì il quartfinal e frunta sin il Portugal. En tut las quatter partidas n'han «Les Bleus» fatg sezs nagin gol or dal gieu. Dals total trais gols è in stà in penalti e dus autogols. Uschia era il gol da la victoria per restar en il turnier, che la Belgia ha fatg per ils Franzos. Empè da spectacul offensiv mussa l'equipa dal trenader Didier Deschamps ses art da defender. Era cun sia excellenta offensiva enturn il superstar Kylian Mbappé gioga la Frantscha senza inspiraziun, bunamain in pau lungurus. «Nus vulain gudagnar e vegnir en il final. Tuttina sche sajettain 3 u 15 gols». Uschia il rutinà Antoine Griezmann.
Er il Portugal n'ha betg persvadì en l'otgavelfinal. Il gieu encunter la Slovenia, in gieu dals dramas, surtut enturn il superstar Cristiano Ronaldo cun sias larmas suenter ch'el na fa betg il penalti en la prolungaziun. Portugal – Slovenia, la suletta partida cun ina lutga da penaltis per erruir tgi che resta en il turnier. Là mutescha il goli dal Portugal, Diogo Costa, a l'erox. El tegna gist trais penaltis.
Tar las trumpadas a questa Euro dastg'ins segir numnar la Pologna cun ses superstar Robert Lewandowski u era la Croazia cun ses erox naziunal Luca Modric. Per la Pologna, cun be in punct, èsi gia avant l'ultim gieu da gruppa cler, che l'Euro è a fin. La Croazia, avant trais onns terza al campiunadi mundial e stada en il final da la Nations League, è vegnida sco favurit zuppà a l'Euro. Suenter ina terrada e dus paris sto la Croazia turnar a chasa e Luca Modric, cun larmas en ils egls, discurra d'in mument nair per il ballape croat.
Tar las surpraisas da questa Euro, era sche cun ina pitra fin, l'Austria. L'Austria ha giugà ina suverana fasa da gruppa en la gruppa cun la Frantscha, ils Pajais Bass e la Pologna. Ils Austriacs vegnan emprims da gruppa, fascineschan e laschan crudar in'entira naziun en euforia. L'equipa da trenader Ralf Rangnick daventan la finala ils eroxs tragics da quella Euro. Perdan encunter la Tirchia cun 1 a 2. Era sche l'Austria è stada la meglra equipa sin il plaz, cun 21 sajets sin il gol ed ils Tircs be 6, prenda lur paraula da stad e lur siemi da scriver istorgia da ballape ina fin abrupta. Uschia vegni en il quartfinal tar il duel Tirchia cunter ils Pajais Bass. Suenter 16 onns vegnan ils Ollandais puspè ina giada uschè lunsch ad in campiunadi europeic. Suenter ch'ils Ollandais termineschan la fasa da gruppa cun ina terrada, in pari ed ina victoria sin il terz plaz, persvadan els en l'otgavelfinal cun il 3 a 0 encunter la Rumenia.
Atmosfera e culissa da fans gigantica
Stadions e public viewings plains, fevra da ballape, tempra da festa e party in pau dapertut. Milliuns da fans da tut l'Europa inundeschan la Germania. Procuran cun lur marschs da fans, lur chant e parolas per lur naziunalas, per ina culissa gigantica ed impressiunanta plain colurs cun blers muments da pel-giaglina. Il campiunadi europeic, ina giada dapli in mussament che ballape collia.
Ils fans che crodan si il pli fitg e che transfurmeschan entiras citads en colur oranscha, ils Ollandais. Lur «Naar links ... naar rechts» mutescha ad ina sort chanzun da quella Euro. Sper ils aderents d'Oranje han er ils Scots procurà per pulita atmosfera e la communitad da fans la pli dad auta segir quella dals Tircs. Ed ils fans da la Naziunala svizra han irrità pulit la polizia en Germania. Quai cun ir tras las vias e clamar «Schwiizer Nati». Ils Tudestgs supponivan davos il pled «Nati» tut insatge auter ch'ina naziunala da ballape.
Svizra u l'Engalterra? –differenza d'opiniun tar il CB Schlarigna
Fabio Barros Sousa e Matthew Snell giogan normalmain per il medem team – per il CB Schlarigna. Ma tar il gieu Svizra cunter l'Engalterra battan ses cors per duas differentas squadras.
Fabio Barros Sousa, tar l'engles Matthew Snell è creschì si a Devon en il sidvest da l'Engalterra. El spera fermamain da vesair sia patria en il mezfinal, ma propi optimistic n'è el tuttina betg. Schegea ch'ils Englais hajan sin palpiri la meglra equipa saja el betg cuntent cun la prestaziun fin qua.
Per Fabio Barros Sousa è entant cler – la Svizra gudogna. Cun passiun sustegna el la squadra naziunala. Gnervus èn en mintga cas omadus.
Er en l'Engalterra datti fans svizzers
Damian Nay (55), oriund da Mustér abita dapi il 1998 en l’Engalterra. Emprim per 20 onns a Londra e dapi in temp a Bracklesham Bay a la costa dal sid. El è grond amatur da ballape e malgrà che l’Engalterra è gia dapi in temp ses dachasa, èsi cler per il Sursilvan: «Mes cor dat per la Svizra». El saja svizzer tras e tras e quai na vegni betg a sa midar.
El ha raquinta ad RTR tge ch’el manegia davart quest duel e tge che la populaziun englaisa spetga da quest gieu e da lur naziunala en general.
Spedescha la Svizra a chasa l'Engalterra?
Fin uss ha la Svizra fascinà e l'Engalterra trumpà a questa Euro. En vista al gieu per vegnir en il mezfinal numna inqual expert da ballape la Svizra favurit che possia profitar dal momentum. Tut constat entaifer l'equipa ed il trenader Murat Yakin ha adina puspè persvadì e fatg surstar cun sia tactica. La Svizra sa preschenta cun bler confidenza e persvasiun. Cun ina enorm buna e ferma defensiun. Enamez il capitani Granit Xhaka che dirigia. E sajettar gols san dapi quest turnier plirs giugadurs. set gols ha la Svizra fatg fin uss a questa Euro, mintgin ha in auter giugadur sajettà.
La chemia entaifer la Naziunala svizra constat. Tut armonisescha, sin e sper il plaz. L'equipa va cun in plan sin il plaz ed è effectiva. La Svizra ha laschà tremblar ils Tudestgs cun il pari dad 1:1. Ed ella ha terrà cun in ballape brilliant l'Italia. Suenter questas prestaziuns encunter ils pajais vaschins ed il frar e la sora gronda dal ballape, dastga la truppa da trenader Murat Yakin semiar dal proxim triumf.
La Svizra siemia e spera – La fin triumfeschan ils Englais
Encunter l'Engalterra survegn la Svizra la schanza da scriver istorgia e cuntanscher l'emprima giada il mezfinal ad in turnier grond. L'euforia tar ils fans è gronda. Blers vesan la Svizra gia en il final. Ma era sche l'Engalterra ha mussà tant sco nagut a questa Euro è lur qualitad individuala enorma. La Naziunala englaisa ha ina valita dad 1,5 milliardas ed è uschia la pli chara a quest turnier. Il duo Jude Bellingham e Harry Kane han ina valita sco tut ils Svizzers ensemen. Ina qualitad che po fin la fin far la differenza e decider il duel encunter la Svizra.
