- Marco Odermatt SUI 2:30,68
- Henrik Kristoffersen NOR (+0,73 sec.)
- Loic Meillard SUI (+1,66 sec.)
Cura che Loic Meillard ha surpiglià la testa sco terz davos n'èn ils fans en l'arrivada dad Adelboden betg pli stads da franar. Il skiunz da 26 onns ch'era gia vegnì terz avant dus onns al Chuenisbärgli ha cun dus buns percurs segirà ses 12avel plaz da podest en la cuppa mundiala.
Sco segund davos è Henrik Kristoffersen sa mess sin pista. Ed il Norvegiais ha mussà ina cursa perfetga e distanzià Meillard per bunamain ina secunda. Ma quai n'ha betg fatg vegnir gnervus Marco Odermatt. Cun sia classa e sia furma, ma er cun ristga totala, ha el respundì cun il meglier temp er en il segund percurs e la finala triumfà a moda suverana avant ses pli grond concurrent en questa disciplina, Henrik Kristoffersen.
Per Marco Odermatt èsi gia la 17avla victoria en la cuppa mundiala, la quarta en tschintg slaloms gigants en quella stagiun ed il 13avel plaz da podest en seria en sia disciplina da parada, quai avant radund 35'000 fans svizzers.
4 Grischuns sut ils top 30
Persvadì ha principalmain er Gino Caviezel. Il Grischun da 30 onns è vegnì 8avel. Cun Thomas Tumler, Daniele Sette e Fadri Janutin hai anc dà puncts per trais ulteriurs grischuns. Per Livio Simonet da Casti n'hai però betg tanschì da sa qualifitgar per il segund percurs.
Ils resultats dals Grischuns:
- 8. Gino Caviezel (+2,77 sec.)
- 19. Thomas Tumler (+4,58 sec.)
- 23. Daniele Sette (+5,25 sec.)
- 26. Fadri Janutin (+5,67 sec.)
La dumengia stat sin il program ad Adelboden il slalom. L'emprim percurs cumenza a las 10:30 uras, il segund percurs cun ils megliers 30 è a las 13:30 uras.