Savens han mancà be paucs tschientavels per sa qualifitgar per il segund percurs – uschia er al slalom gigant da chasa a Lai. Vanessa Kasper ha terminà l’emprim percurs sin plazza 34. Vegnida franada sin questa pista Silvano Beltrametti al pe dal Rothorn è la skiunza da 25 onns dentant er dal fatg, ch’ella era cupitgada grevamain sin questa pista avant quatter onns e rut la stgaina e l’oss dal ventrigl. Pervia da quest accident saja ella er ida cun grond respect a la partenza, uschia la skiunza da Schlarigna.
I restan anc intginas cursas
Tuttina ha Vanessa Kasper pudì far in pass enavant en questa stagiun e spera uss anc da pudair mussar intginas bunas cursas – tant en la cuppa mundiala sco lura er en la cuppa d’Europa e sco finiziun al campiunadi svizzer la fin da mars a San Murezzan, quasi avant ses isch-chasa.
