Avant quatter onns, a Pyeongchang, è Talina Gantenbein vegnida 12avla en la cursa dal skicross. Per la giuvna, ch'aveva lura 19 onns, in success. Che la skiunza da Scuol ha potenzial per anc dapli ha ella dentant mussà spezialmain ils ultims 12 mais. Pliras giadas ha ella fatg il pass en ils top 10. Al campiunadi mundial en Svezia avant bun in onn è ella vegnida quarta ed ha manchentà ina medaglia mo per pauc.
In mais d'emblidar
Mez schaner è Talina Gantenbein cupitgada grevamain durant ina cursa da la cuppa mundiala en il Canada. Dapi lura n’ha l’atleta da 23 onns absolvì naginas cursas. Quai ha era da far cun il fatg, ch’ella ha gì corona curt suenter. La preparaziun sin ils gieus olimpics 2022 è pia stada tut autra che optimala per l’Engiadinaisa. Tuttina sa senta Talina Gantenbein uss bain ed è pronta per procurar per in exploit a Peking.