Ils atlets e las atletas da skicross svizras han da magunar ina trumpada, suenter la concurrenza da la cuppa mundiala ad Arosa il mardi saira. La meglra rangaziun ha fatg l’Engiadinaisa Talina Gantenbein, cun ir sin plaz 6.
Omaduas victorias en la cursa difficila pervi da la plievgia èn idas al Canada, e cun ils fragliuns Hannah Schmidt e Jared Schmidt perfin a la medema famiglia. E Marielle Thompson e Reece Howden han mintgamai fatg plaz 2, ed uschia era procurà per duas victorias dublas canadaisas. Da dir è che trais dunnas èn vegnidas rangadas sin plaz 2, pervi da crudadas.
Nagin success per ils trumfs svizzers
Per Fanny Smith che ha gudagnà quatter giadas ad Arosa, e per il matador local Alex Fiva – èn ils quartfinals stads la staziun finala. Smith ha fatg in sbagl curt avant l’arrivada e pers tempo, uschia che sia collega da squadra Talina Gantenbein e l’Austriaca Katrin Ofner han anc pudì surpassar ella.
Alex Fiva cun ses 37 onns ha discurrì suenter sia cursa dal quartfinal d’avair fatg ina retscha da sbagls da noviz. L’emprim n’è la partenza betg gartegiada. Suenter haja el in mument simplamain chalà dad ir cun skis, cura ch’el haja vis ils auters davent el. E per finir saja el er anc vegnì giud la pista.
