La squadra naziunala da skicross è stada a la tschertga d’ina pussaivladad da trenar sin ina pista fixa. Uss han els chattà quella a San Murezzan. Ils avantatgs èn gronds tenor Enrico Fetsch, scheftrenader da la squadra naziunala svizra. Per exempel da pudair exercitar sin ina pista, ch’ins na mida betg savens. U sch'ins vesia sche l’atlet u l’atleta haja fadia en tschertas parts dal traject, sco sigls u stortas, possian els fabritgar dasper la pista ils elements or da naiv che fan basegn per trenar.
Basa da trenament era suenter la stagiun da skis
La pussaivladad è unica en il Grischun. Perquai ch'ins na po betg mo trenar ils atlets e las atletas da la categoria pli auta, di Enrico Fetsch. Era tut ils ulteriurs caders da la squadra naziunala svizra han ina plazza per trenar. El vesa questa nova pista da skicross sco ina basa da trenament, u schizunt sco nov dachasa per la squadra naziunala Svizra.
Ina schanza per il sport
Che quai saja ina buna idea chatta er Alex Fiva, atlet e campiun mundial da skicross 2021. Ma sper il fatg ch'el haja novas pussibilitads da trenar, è el cuntent da vesair insatge auter. Sper la pista per ils professiunals, dat quai in traject pli simpel per las massas. Cun quai vesa il public che frequenta quella pista simpla, sco ils professiunals exerciteschan. E sch'ils atlets e las atletas han temp, pon ellas ed els far ina baterlada. Sch'il public survegn interess per il skicross, saja quai ina buna reclama per il sport.
La nova pista da skicross è 600 meters lunga e sa chatta sin il territori da skis Corviglia, sut la staziun Salastrains.
