Igl è ina premiera, per l’emprima giada insumma maina ina cursa rapida sur cunfins. Partenza da la cursa rapida dals umens è sin 3’700 meters sur mar, l’arrivada bun 900 meters pli a bass a Cervinia en la Val Aosta. En questa autezza n’hai anc mai dà ina cursa rapida. L’autezza è cunquai ina da las grondas sfidas sco er la distanza da la cursa che maina bunamain quatter kilometers a val. Percunter n'è la cursa a Zermatt/Cervinia betg uschè pretensiusa sco las cursas rapidas da Bormio u a Kitzbühel. I na dettia betg passaschas che sajan tecnicamain fitg grevas, uschia il tenor dals atlets. La cursa viva en emprima lingia er dal panorama magnific enturn il Matterhorn.
Il num «Gran Becca»
Il num «Gran Becca» munta il grond piz. Uschia vegn il Matterhorn numnà en il dialect dals abitants en la Val Aosta. E damai che la cursa rapida sa chatta per dus terzs sin terren talian han ils organisaturs vulì in num talian per questa pista. Ed il Matterhorn è quai piz ch’accumpogna skiunzas e skiunzs da la partenza fin l’arrivada.
Stefan Rogentin – il sulet trumf grischun
Cun la premiera a Zermatt/Cervinia lantscha er Stefan Rogentin sia stagiun. Il skiunz da 29 onns da Lai è suenter che Carlo Janka e Mauro Caviezel han terminà lur carrieras il grond trumf grischun en la cursa rapida. Sia disciplina da parada è dentant il super-G. En questa disciplina ha el cuntanschì la stagiun passada quatter plazzas sut ils top 10. Al super-G da Wengen è Rogentin schizunt stà sin il podest sco segund. Ina plazza da podest vuless il Grischun er cuntanscher en la cursa rapida. El haja pudì trenar fitg bain en vista a la nova stagiun ed er pudì far progress en questa disciplina roiala.
Mussà ch’el sa senta er bain sin la pista «Gran Becca» ha Stefan Rogentin gia en l’emprim trenament nua ch’el è vegnì 8avel cun in retard da passa ina secunda sin l’Austriac Otmar Striedinger. Las meglras cartas dals 15 skiunzs svizzers che Swiss Ski ha nominà per questa emprima cursa rapida da la stagiun vegn dentant dà a Niels Hintermann sco er a Marco Odermatt.
La partenza per las duas cursas rapidas dals umens a Zermatt/Cervinia èn la sonda e la dumengia mintgamai a las 11:30 uras.
