A Leogang en l’Austria ha Vital Albin procurà per il punct culminant ord vista svizra. Il mountainbiker rumantsch ha ditg profità dal tempo da ses collega Mathias Flückiger. Pir a la fin ha el anc stuì laschar surpassar il Rumen Vlad Dascalu. Per Albin èsi en mintga cas il pli grond success en sia anc giuvna carriera. E per Flückiger, il vice-campiun olimpic e victur dal classament general da la stagiun passada, èsi l’emprima victoria da la cuppa mundiala en questa stagiun.
Quai è stà in grondius sentiment ed in di ch'jau na vegn mai ad emblidar.
Vital Albin ha cun ses exploit è fatg surstar la concurrenza. Suenter la cursa ha el astgà prender encunter gratulaziuns sin tuts mauns. Il telefonin haja scalinà senza fin, ha Vital Albin ditg cun in surrir. Per far festa n'hai dentant betg tanschì. La sonda ha il giuven da 23 onns stuì levar e far ord la chombra d'hotel in examen da giurisprudenza. E la dumengia en la cursa roiala da cross country ha Albin astgà parter per l'emprima giada ord l'emprima retscha cun ils megliers otg.
Podest umens d'elita
- Mathias Flückiger SUI 21:46 minutas
- Vlad Dascalu ROU +0:11 min.
- Vital Albin SUI +0:21 min.
Nino Schurter ha sco 11avel manchentà be per pauc in plaz sut ils top 10. Sin ses cumpatriot Mathias Flückiger ha il campiun mundial pers 37 secundas. Cun Joel Roth sco 13avel ha anc in ulteriur svizzer persvadì.
Loana Lecomte ina classa per sa sezza
Tar las dunnas è Alessandra Keller stada la meglra svizra. Keller è vegnida quarta ed ha uschia manchentà be per pauc in plaz da podest. Gudagnà la cursa, quai a moda suverana, ha Loana Lecomte. La Franzosa ha triumfà avant l’Ollandaisa Anne Terpstra e Caroline Bohé dal Danemarc. Las ulteriuras svizras: Sina Frei è vegnida 6avla, Linda Indergand 11avla e Jolanda Neff 12avla.
Ils puncts culminants spetgan a Lai ed a Les Gets
Las proximas cursas da la cuppa mundiala spetgan dals 8 fin ils 10 da fanadur a Lai. Per ils Svizzers las cursas da chasa ed in emprim punct culminant da la stagiun. La gronda finamira da Vital Albin è dentant da pudair ir a la partenza al campiunadi mundial da mountainbike la fin avust a Les Gets en Frantscha.