Igl è la 113avla minuta, cura ch'il «joker» dals Tudestgs, Mario Götze, decida il final dal campiunadi da ballape mundial 2014. Quasi 90 minutas ha el mo observà da la vart la stretga partida encunter l'Argentina. Lura sajetta el il gol decisiv, il stadion explodescha e la Germania gudogna 1:0. Quai mussa quant impurtant ch'in bun banc da reserva è. Avair in bun banc da reserva, quai na munta dentant betg mo avair qualitad, mabain era quantitad. Tge che capita sch'il banc è vid, vesan ins uss numnadamain tar duas equipas sursilvanas.
En sasez han quellas, Union Trin e Sedrun/Mustér, il medem problem sco tut tschels era en Surselva. Els han numnadamain adina pli paucs giugadurs activs. A l'ur da la Surselva è la situaziun dentant anc pli precara. Perquai retiran Sedrun/Mustér ed Union Trin lur equipas dal campiunadi da ballape da la 5avla liga. Sedrun/Mustér ha schizunt gia dà e gudagnà sia davosa partida cun 7:1 encunter Danis-Tavanasa la fin d'emna passada. Fertant gioga Union Trin il venderdi saira per la davosa giada a chasa encunter la terza equipa da Cuira. Silsuenter sto la Surselva quintar cun duas equipas activas pli pauc.
Mo malgrà che Sedrun/Mustér e Trin ston omadus retrair lur equipas da la 5avla liga, sa chattan els en situaziuns differentas ed han perquai era plans differents per l'avegnir, sco la FMR ha udì dals presidents.
Senza juniors èsi grev
Bunamain 17 onns è Union Trin sa participà al campiunadi da ballape dals activs ed è ina giada vegnì promovì en 4. liga, sco ins po leger sin la pagina d'internet. Mo en tut quests onns n'èsi mai reussì d'organisar ina partiziun per juniors. E quai è in dals problems, sco il president Jürg Adam di: «Senza juniors èsi simplamain grev d'avair avunda giugadurs. En il medem mument èn noss activs adina vegnì pli vegls ed han perquai pli pauc interess da participar al campiunadi. Insacura na va il quint simplamain betg pli si.»
Ils giugadurs che veglian tuttina dar vinavant giajan lura probablamain a dar cun ils seniors da Panaduz e Razén en il Team Imboden, di Jürg Adam. A Trin na dettia probablamain era a lunga vista nagin'equipa pli, schegea ch'il club vivia vinavant: «Nus bandunain l'OFV (la Federaziun da ballape da la Svizra orientala) e s'orientain da nov. Malgrà che l'interess per dar ballape activ manca, avain nus numnadamain in'uniun viva ed ina buna cumpagnia. Quai vulain nus mantegnair ed era esser pli averts per autras activitads.» Proximamain vegnian els perquai ad adattar ils statuts. Insumma, il club vivia vinavant e magari era il ballape a Trin. In CB Union Trin tschertgan ins dentant bainprest adumbatten en la tabella da la 5avla liga.
Mo pli cun juniors
En ina situaziun empè differenta sa chatta fertant Sedrun/Mustér. Era sisum la Surselva mancan simplamain ils giugadurs per cuntinuar cun in'equipa activa, sco il president Franco Curschellas di: «Actualmain pudessan nus quintar cun 11 giugadurs. Quai na tanscha simplamain betg.» Ma en cuntrast cun Trin ha Sedrun/Mustér era intgins giuvens en l'equipa e juniors, di Franco Curschellas vinavant: «Nus cuntinuain segiramain cun il manaschi da juniors ed avain finalmain era chattà in arbiter per pudair far quai. Cunquai che nus avain plitost blers juniors, schizunt il segund bler suenter Schluein Glion, na vesi gnanc ora mal.»
Tge che pertutga ils activs che vulan dar vinavant ballape, lavurian ins plinavant gia vi d'ina schliaziun, sco il president explitgescha: «Nus avain intgins giuvens che pon anc dar A-juniors e tschels tschintg, sis vegnan a dar u tar Trun/Rabius u Danis-Tavanasa. Quai vegnin nus anc a sclerir.» Ch'i vegnia proximamain puspè a dar in'equipa d'activs tar Sedrun/Mustér, saja tuttina strusch probabel. A lunga vista saja plitost da spetgar ch'ils clubs da la Cadi fusiuneschian. Per il mument na saja quai dentant nagin tema, sco il president da Trun/Rabius Patrick Rothmund conferma: «La gruppaziun da Trun/Rabius e Danis-Tavanasa funcziuna gist uschè sco quella dals juniors en Surselva. Perquai n'è ina fusiun nagin tema.» Mo la fin finala èsi in zic sco adina. Cura che las equipas en Surselva èn confruntadas cun la mancanza da giugadurs, sa derasa la fama da fusiuns.