Dad in maun èsi in comeback, da l'auter maun ina premiera. Pertge il Swissalpine n’ha cun Flem Laax betg sulet chattà in nov dachasa, mabain l’entir concept è vegnì adattà, modernisà e cumplettà cun divers elements. La 37avla ediziun da quest ultratrail legendar sa preschenta pia questa stad en in no vestgì.
Il 1986 aveva Andrea Tuffli, il bab dal Swissalpine, clamà en vita questa cursa che manava da Tavau a Bravuogn sur la chamona da Kesch ed il pass dal Sertig enavos a Tavau. Il Swissalpine è s’etablì tar ina da las pli grondas ed impurtantas cursas da trail en l'Europa. Il 2021 è stada la davosa ediziun. Suenter in onn senza cursas pervia da la pandemia da Corona hai bain dà vinavant sumegliantas cursas a Tavau. Quai dentant cun ina nova organisaziun e sut il num «Davos X-Trails». Il comité d'Andrea Tuffli era sa retratg. Ussa, quatter onns pli tard, è il Swissalpine enavos en Surselva.
Da 14 fin 82 kilometers
Novas èn sa chapescha las rutas. Mo ils organisaturs profiteschan d’ina experientscha immensa ch'els han fatg durant 36 onns a Tavau. I na sto pia betg vegnir inventà la roda da nov. Ed il num, quel resta era. Quai saja impurtant per la reclama, di la manadra da project Livia Schröpfer. Il Swissalpine è ina marca enconuschenta lunsch sur ils cunfins svizzers ora.
Swissalpine
A Flem Laax spetgan differentas cursas sur distanzas da 14 enfin 82 kilometers. La cursa roiala maina tras la Ruinaulta siadora sin l'Alp Mora sur Trin, via Bargis sur il Crap da Flem, vinavant a Segnesboden, Nagens, Crap Masegn, via Crap sogn Gion e Falera enavos a Prau la Selva a Flem ch'è il center da quest festival da currer. Là sa chatta la partenza e l'arrivada.
Zic a zic s'avischinar a las cifras da Tavau
Dapi dus onns è il comité d’organisaziun vid organisar e planisar quest event. Dapi il favrer è il portal d'annunzias avert. Enfin oz sajan radund 300 curridras e curriders s'annunziads. Per cumparegliar: Durant ils megliers onns dal Swissalpine a Tavau, dal 2010 enfin il 2015, gievan passa 5000 curridras e curriders a la partenza. Tar la premiera a Flem Laax quintan ils organisaturs cun 400 enfin 500 annunzias. Fin il 2029 è la finamira d’arrivar sin quest status dal Swissalpine a Tavau.
