La ciclista da 23 onns da Müstair è turnada dal Tour de Suisse cun in satgados plain emoziuns ed experientscha. Gugent avess Larissa Tschenett er terminà questa cursa ch’ha manà quest onn sur quatter etappas tras la Svizra franzosa. Suenter la segunda etappa, ina cursa encunter l’ura, è ella però vegnida sclausa da la cursa perquai ch’ella n’ha betg cuntanschì l’arrivada en la limita da temp. I han mancà be paucas secundas.
Tge potenzial che Larissa Tschenett ha sin il velo da cursa ha ella gia mussà en quels dus trais onns ch’ella va pir cun velo. Al Tour de Suisse ha ella dentant er vis tge che manca anc per tegnair pitg cun las meglras dal mund sco per exempel Demi Vollering, l’Ollandaisa ch’ha gudagnà trais da quatter etappas ed uschia er il classament general.
Jau hai dà mes meglier pussibel e donn ch’i n’ha betg funcziunà da terminar il Tour, ma i vegn segir puspè ina schanza.
A Tschenett manca franc ina giada l’experientscha ed ils kilometers sin il velo. La Grischuna è er stada ina da las sulettas a la partenza ch’ha nagin contract da profi e che lavura anc dasperas, quai en in pensum dad 80% sco cussegliadra da persunal a Cuira.
La motivaziun è per far il proxim pass
Per Larissa Tschenett pudess il Tour de Suisse esser stà in emprim grond pass direcziun ina carriera sco ciclista da via. A questa cursa ha ella ina giada vis co tut funcziuna. E questa schanza da dastgar parter in’emprima giada ad ina cursa da la WorldTour dat er gronda motivaziun da cuntinuar sin questa via e trenar vinavant per in di realisar il siemi da pudair viver sco profi ciclista e forsa er ina gia astgà sa participar al Giro d’Italia u al Tour de France ni era preschentar ina giada la Svizra ad in grond eveniment sco in campiunadi mundial u gieus olimpics.
Uss vul Larissa Tschenett però l’emprim ina giada far furora a las cursas naziunalas. Duas ha ella gia gudagnà quest onn, per l’ina il GP Cham-Hagendorn la fin avrigl e per l’autra il Pfingstrennen Ehrendingen il matg. E sonda, ils 22 da zercladur, parta la ciclista da Müstair er als campiunadis svizzers ad Aire-la-Ville en il chantun Genevra.
