L'aventura da las giugaduras da tennis da Trun en la liga naziunala B 30+ è a fin. Ch'ellas han insumma pudì sa mesirar en uschè in'auta liga sco anc mai è stà pussaivel grazia a las fermas prestaziuns da l'onn passà. Las Sursilvanas han dominà lur adversarias da gruppa en la liga naziunala C.
En il duel da promoziun encunter las damas da Meggen era sa resultà in pari 3:3. Ils total sets e games gudagnads han la finala impedì la promoziun directa. Cunquai ch'igl è stà uschè stretg, aveva la federaziun da tennis decidì, che l'equipa sursilvana possia tuttina giugar questa stagiun en ina liga pli auta.
In'experientscha ch'ha purtà enavant l'equipa
Cun plaschair e motivaziun – e senza propi savair tge che spetg'ellas en la liga naziunala B da las damas 30+ – hajan ellas intensivà il trenament ed era clamà per agid in trenader. Per far quest proxim pass hajan ellas stuì vegnir or da lur zona da confort.
L'aventura haja l'equipa vesì sco gronda schanza. Numerus gieus èn stads gulivs, surtut l'ultim duel da gruppa cunter las damas da Küssnacht a.R. ch'è ì a fin 3 a 3 (in duel sa cumpona da 4 gieus singuls e 2 dubels). Cunter las giugaduras da Wallisellen e d'Altstätten – ch'eran tuttas classifitgadas meglier che las Sursilvanas – hai dà terradas dad 1 a 5.
Déjà vu en il cumbat encunter la relegaziun
Davart restar en la liga naziunala B da las damas 30+ ni puspè turnar en la C, ha il duel da relegaziun encunter las Turitgaisas da Rolli-Seuzach stuì decider. In dir cumbat cun gieus intensivs ed adversarias gulivas. A la fin han las giugaduras da Trun trais victorias sin lur conto – lur adversarias medemamain, uschia ch'ils blers sets e games decidan a favur da Rolli-Seuzach. Senza propi perder vai pia enavos per l'equipa sursilvana en la liga naziunala C – tuttina sco l'onn passà. Era lura n'avevan ellas betg dumagnà la promoziun, era senza propi avair pers.
