Las giugadras dal Club da tennis da Panaduz defendan il titel da campiun svizzer tar las dunnas 30+. La davosa fin d’emna han ellas gudagnà a Burgdorf en il chantun Berna il final d’Interclub cunter Murten senza discussiun cun 4:0.
Cunquai è l’equipa da Panaduz era quest onn il numer 1 tar las dunnas da tennis sur 30 onns. Avant sis onns avevan ellas dumagnà il pass en la liga naziunala A – la pli auta liga svizra – e l’onn passà scrit istorgia cun gudagnar il titel. Anc mai eri numnadamain reussì ad in’equipa da tennis da dunnas dal Grischun da daventar campiun svizzer.
Era sco favurit èsi da dar mintga punct. Gudagnà èsi pir cura ch’il gieu è a fin, cura ch’i vegn dà il maun e gratulà in'a l’autra.
Ina stagiun perfetga
Las dunnas 30+ dal Club da tennis da Panaduz n’han laschà nagina schanza a la concurrenza quest onn. Durant la qualificaziun han ellas pers be dus gieus. Tant en il mezfinal cunter Martigny sco er en il final cunter Murten – in’equipa dal chantun Friburg – hai dà in resultat cler da 4:0 victorias.
Nus avain in fitg bun spiert d’equipa ed uss è la finamira da realisar il hattrick, da gudagnar l’onn proxim il terz titel da campiun svizzer en seria.
Simona Demont d'in success a l’auter
In grond merit vi da quai titel da campiun svizzer ha era Simona Demont, la Rumantscha en il team dal Club da tennis da Panaduz. La giugadra oriunda da Trun ha dà l’emprim gieu en il final, gudagnà quel en trais sets, ed uschia mess la basa per il success.
Demont è er ida en quai final cun ina gronda purziun motivaziun. L’entschatta da zercladur ha ella gudagnà gist trais medaglias als campiunadis europeics da tennis a Velj Losjni en la Croazia. En la categoria 30+ ha ella gudagnà aur en il mixed dubel, quai ensemen cun il Rumen Alexandru Stoia. Aur hai era dà en in dubel da las dunnas 35+, quai ensemen cun la Taliana Sara Marcionni. En il turnier singul 35+ ha Simona Demont, ch’è per il mument rangada sin posiziun 230 da la Svizra sco ina R2, gudagnà la medaglia da bronz.
Tar l’equipa da las dunnas 30+ dal Club da tennis da Panaduz ch’han danovamain gudagnà il titel da campiun svizzer fan sper Simona Demont er anc part Manuela Pinchera, Rita Zenunaj, Vanessa Wellauer, Mari Mahoni, Clelia Melena e Seraina Neuwerth.
