Las damas da tennis da Panaduz èn campiunessas svizras en la categoria 30+. En la liga naziunala A gudognan ellas il duel da final ordaifer encunter Münsingen suveran cun 4 a 0 gieus. Ils dus gieus da dubel n’èn betg pli stads necessaris. Suenter che las giugadras da Panaduz han gudagnà tut ils gieus singuls è il titel da campiunessas svizras stà realitad.
L’equipa da Panaduz 30+ ha dominà l’entira qualificaziun en la liga naziunala A e terminà quella sin l’emprim plaz. Per las Grischunas è il titel da campiunessas svizras en la pli auta liga da tennis, il pli grond success en lur istorgia. Ed ellas scrivan era istorgia da tennis per il Grischun. Anc mai è ina equipa da dunnas grischuna ida per il titel da las meglras svizras.
Fatg frunt al squitsch
L'onn 2018 è l'equipa da Panaduz ida si en ligia naziunala A. Dapi lu han ellas adina empruvà da recaltgar il titel da campiunessas svizras. L'onn passà han ellas manchentà piz a cup da vegnir en il final. Onn è tut gartegià. Gia al cumenzament da la stagiun han ellas gì declerà il titel sco finamira ed uschia era fatg squitsch a sasezzas. La devisa è stada da prender gieu per gieu.
Pir suenter la victoria suverana en il mezfinal encunter Martigny (4:0 gieus) fiss insatge auter che la victoria en il final encunter las Bernaisas da Münsingen stà ina trumpada, raquinta Simona Demont, la Rumantscha en l'equipa. La Sursilvana è pir dapi questa stagiun part da l'equipa 30+ da Panaduz. E gist en ses emprim onn en la liga naziunala A dastga ella sa legrar dal titel da campiunessas svizras.
Suenter ch'avain gudagnà suveran il mezfinal, fissi stà ina trumpada sch'avessan pers il final
Uss sa legran las 6 giugadras sin la meritada festa cun il club da tennis da Panaduz, ch'ha era ses merits cun ses sustegn sur l'entir onn. E quest sustegn han las damas 30+ era sentì en il final, in entir bus cun fans ha fatg viadi dal Grischun giu Berna ed han cun lur preschientscha era contribuì in pau a quest success istoric.