Il Swiss Epic saja il punct culminant da la stagiun da mountainbike, di il ciclist Fadri Barandun da Samedan avant sia settavla participaziun a la cursa. La cursa extrema sur 5 etappas, cun total 341 kilometers e passa 11’000 meters differenza d’autezza. Per l’ediziun da quest onn ha il mountainbiker engiadinais stuì ir a la tschertga dad in nov partenari. Cun Simon Vitzthum – oriund da la Germania e sesent a Lucerna – è quai grategia. Vitzthum è era ina ciclist dad emprima qualitad. Ensemen cun sias fermezzas e cun l’experientscha locala da Fadri Barandun èn las premissas per in bun resultat dadas.
Start a La Punt e final a Tavau
La cursa da pliras etappas Swiss Epic datti dapi 10 onns. Ils ultims onns è la cursa mo pli stada sin rutas e trails en il Grischun. La partenza per la cursa da quest onn è a La Punt. Las etappas mainan alura bundant 600 ciclistas e ciclists da La Punt a Tavau – da là vinavant a Cuira – e puspè enavos a Tavau. Suenter tschintg etappas vegnan las participantas ed ils participants da la cursa ad avair fatg 341 kilometers sin il mountainbike.
Cumenzà l’onn 2018 – ussa pront per ina plazza da podest
Il Swiss Epic e per l'indigen Fadri Barandun il punct culminant da la stagiun da bike. Durant l’entir onn sa prepara el sin questa cursa. Perquai che mintga etappa dura pliras uras, è era il trenament lasuenter. Tranteren pon ins dentant er mo trenar intervals – vul dir secziuns pli curtas, persuenter pli intensivas, uschia che il corp s’endisa da sa revegnir spert. Tant Fadri Barandun sco er ses collega da squadra Simon Vitzthum èn pronts per il Swiss Epic 2024 cun il podest avant egl.