A la fin da la stagiun da skis 2023/24 ha Swiss Ski bittà Sandro Simonet ord il cader naziunal. Per il skiunz surmiran da 29 onns ina greva frida. Terminar cun la carriera, metter ils skis d’in maun, quai ha Simonet però betg vulì far. Sin basa privata vul el uss turnar enavos en la cuppa mundiala e sco el di sez, lantschar da nov la carriera e dar in comeback.
Igl è sa midà fitg bler ed i dat enorm blera lavur d’organisar e far tut sez. E cunzunt il finanziar tut sez è ina gronda sfida. Jau less dir, igl è propi sa midà per 180 grads.
La vita sco skiunz professiunal saja sa midada cumplettamain, di il spezialist da slalom. Da nov sto el far ed organisar tut sez. Vul dir: el sto organisar sulet ils trenaments, ils viadis, ils hotels ed er preparar ed unscher sez ils skis, tut lavurs ch’èn vegnidas fatgas per el durant ils davos onns. Plinavant sto Sandro Simonet er finanziar tut sez. Al cumenzament da la stagiun è el perquai stà sfurzà da far in budget ed el quinta cun custs da fin 70’000 francs per questa stagiun. Senza il sustegn dals sponsurs, da la famiglia ed er da la metoda «crowdfounding» ch’el ha lantschà l’atun passà na fiss quai strusch pussibel da cuntinuar cun la carriera.
Cuppa mundiala e cuppa d’Europa èn dus differents chalzers. Las cursas da la cuppa d’Europa n’han quasi nagins aspectaturs, tut è pli pitschen e pli quiet.
Actualmain parta Sandro Simonet als slaloms da la cuppa d’Europa. En ils quatter slaloms fin oz è el crudà ora duas giadas e duas giadas ha el cuntanschì in plaz da top 10, n’è però mintgamai betg stà il meglier svizzer. Perquai n’è Simonet er anc betg vegnì risguardà da Swiss Ski per ina partenza en la cuppa mundiala. La proxima schanza spetga la dumengia, ils 19 da schaner, a Berchtesgaden en Germania. En quest slalom da la cuppa d’Europa vul il Surmiran finalmain esser il meglier svizzer per uschia avair la schanza d’astgar ir a la partenza als classichers en l’Austria la fin schaner, a Kitzbühel ed a Schladming. Ils classichers da chasa ad Adelboden e Wengen è Sandro Simonet sfurzà da persequitar be a la televisiun.
