Ils ultims onns èn ellas vegnidas raras, las schanzas sin titels tar las unihockeyanas da Piranha Cuira. Suenter 5 onns senza, han ellas uss triumfà en il final da la Cuppa svizra e laschà turnar il pocal en il Grischun. Ina victoria che strusch insatgi avess pensà ch'ella gartegia. En il final era cun Kloten-Dietlikon quella equipa, ch'è dapi l'onn 2019 sin il tron da las meglras unihockeyanas da la Svizra. Ellas mainan actualmain era a moda suverana la tabella dal campiunadi. Però ha Piranha Cuira dà tacticamain in final brigliant. Defendì solidaric, offensiv curaschusas e stedi gì la survista.
En il chau essan nus stadas pli prontas
Nicole Capatt è cun ses dentant 24 onns mutada ad ina da las impurtantas e fermas pitgas tar Piranha Cuira. Cun ses dus gols e ses pass per dus ulteriurs gols ha la giuvna da Trin contribuì al success ed a la victoria dad 8:4. In titel che fa era stulir inqual vusch critica. Tranter ils onns 2019 e 2018 ha Piranha Cuira gudagnà 7 giadas il titel da campiunessas svizras. Cun la generaziun dad aur co ella vegniva numnada, ha il club da la chapitala dominà la scena dad unihoc. Giugaduras sco Sabrina Arpagaus, Seraina Ulber, Flurina Marti e Corin Rüttimann han suttamess tut a l'unihoc. Han etablì l'equipa naziunal ed internaziunal. Han sur onns era tratg natiers giuvens talents. E per giugaduras da renum da l'exteriur era Piranha Cuira ina top-adressa. Cura che las giugaduras da quella generaziun dad aur han terminà lur carrieras, hai dà ina sort vacum.
In'equipa giuvna che dovra ses temp
Senza las grondas leadras, ch'han rimnà titels tut a dubel, èsi stà da prender il temp cun bajegiar si ina nova equipa cun la generaziun giuvna che surpiglia era responsabladad. La pajaglia per lur perseveranza è il titel da la cuppa svizra. Ch'ins ha sin la via fin tar il pocal eliminà equipas favurisadas u cler pli fermas sco las Turitgaisas da Kloten-Dietlikon.
Propi declerar pertge che tut ha funcziunà en quest turnier ed en il campiunadi svizzers è Piranha Cuira be sin il 7avel plaz, na sa Nicole Capatt betg. Ella spera che l'equipa possia en ils playoffs che cumenzan gia bainbaud, profitar da las emoziuns effectuadas entras il titel da la cuppa svizra. E che tut quai che haja funcziunà là, gidia a laschar ir ellas lunsch en ils playoffs.
La fin da la stagiun è era la fin da Piranha
N'emporta betg quant lunsch ch'i va la finala per Piranha Cuira en ils playoffs. Emoziuns èn garantidas. Cura che la stagiun è a fin, è era il club da Piranha Cuira istorgia. En la nova stagiun èsi da s'endisar che Piranha ha entras la fusiun cun ils clubs da Cuira dals umens num Floorball Chur United. E quai n'è betg la suletta midada. Per la dunnas unihockeyanas datti era ina midada a la banda. Mirco Torri banduna il club. Nov trenader daventa Drago Petrovic che duai dar novs inputs a l'equipa e gidar purtar ella als emprims success sco equipa unida sut in nov tetg.