Dapi la stagiun passada parta Vital Albin tar l’elita. Ina da sias finamiras per la nova stagiun è da far in ulteriur pass enavant ed uschia vegnir pli datiers als megliers dal mund. Il mountainbiker oriund da Tersnaus fa part dal Thömus Maxon Racing Team, l’equipa da l'anteriur profi Ralph Näf. En quest team po Vital Albin er profitar da Mathias Flückiger, il leader da l’equipa e l’actual numer 1 dal mund. Flückiger ha gudagnà l’onn passà la cuppa mundiala generala, ed è vegnì a Tokio vicecampiun olimpic ed a Val di Sole vicecampiun mundial davos Nino Schurter.
Ina stagiun cun bleras cursas
L’onn passà ha Vital Albin tratg a la lunga sia stagiun ed è sa participà a cursas da mountainbike fin la fin october, quai tranter auter en la Tirchia. Mez november ha el cumenzà la preparaziun sin la nova stagiun 2022, quai cun divers champs da trenament a Magglingen, a Tenero, a Finale Ligure en l’Italia, a Gran Canaria, en Tirchia ed en Spagna.
In pli lung viadi ston Vital Albin e ses team uss far per l’emprima cursa da la cuppa mundiala che vegn realisada per l’emprima giada en la Brasilia. Quai a Petrópolis en la vischinanza da Rio de Janeiro, la patria da Henrique Avancini, in dals gronds rivals da Nino Schurter e Mathias Flückiger.
Sper la cursa da la cuppa mundiala da chasa ils 10 da fanadur a Lai, vul Vital Albin oravant tut persvader al campiunadi mundial la fin avust a Les Gets en Frantscha. L’onn passà era el vegnì selecziunà be sco currider da reserva al campiunadi mundial a Val di Sole.
Studi sper la vita da profi
Auter che Mathias Flückiger u Nino Schurter frequenta Vital Albin dasper sia vita da profi anc in studi da giurisprudenza. Quai pretenda ina buna planisaziun ed ina buna structuraziun, per dumagnar tut e per cuntanscher las finamiras. Cumpareglià cun la vita da sportist saja la vita da student in grond cuntrast, ma el dovria e schazegia quai, uschia Vital Albin. En trais quatter onns spera il giuven talent da Tersnaus dad esser a la testa da la cuppa mundiala da mountainbike. Enfin oz ha el pudì far in progress durant mintga stagiun, uschia saja el da buna speranza che quai gartegia.