Senza arbiter nagina partida – quai vala per mintga sport. En il hockey vegn tiers ch'i dovra plirs arbiters. En la segunda liga per exempel – nua ch'il club da hockey Engiadina ed il EHC Lai Valbella giogan il mument la segunda runda dals playoffs – èn mintgamai dus arbiters sin il glatsch.
Per pudair garantir d'avair avunda arbiters ha mintga club da purtar per mintga team che gioga en ina liga almain in arbiter. Uschiglio paja il club ina multa – pli auta la liga e pli auta la multa. Manca ad in club en segunda liga in arbiter custa quai 1'000 francs. Cler ch'ils clubs han in ferm interess e fan tut per pudair purtar in arbiter. Il president dal club da hockey Engiadina, Ruedi Haller, è conscient da las sfidas. Perquai ha il club cun ils juniors in'atgna strategia: mintga giuvenil dal club ha da far il curs d'arbiters. Tuttina manca per la squadra d'activs per il mument in arbiter. Optimal na saja quai natiralmain betg, di Haller.
Adina ina sfida
Per Thomas Rieben – l'arbiter responsabel per las ligas da la Svizra Orientala – è il chattar, scolar e planisar arbiters ina sfida permanenta. En ina stagiun ston vegnir garantidas enturn 3'000 partidas cun arbiters. Era sch'il pool cumpiglia passa 600 arbiters saja quai ina gronda sfida logistica da garantir d'avair arbiters en halla. Uschia sajan els da la federaziun permanentamain vi da motivar persunas da far ils curs d'arbiters.
Or da l'archiv:
Era auters sports, sco il ballape, èn confruntads cun la medema sfida. Ma senza arbiter na datti nagina partida – quai vala per mintga sport.