Bilantscha maschadada per la Svizra al Laax Open. En ils mezfinals dal slopestyle e la halfpipe èn sa qualifitgads quatter Svizzers – tar las Svizras èn duas sa qualifitgadas per il final da slopestyle e nagina en la halfpipe.
Skis (slopestyle): Final cun 2 Svizras e 3 Svizzers
Dunnas
Las skiunzas da freestyle Sarah Höfflin (81,35 puncts) e Mathilde Gremaud (75,23 puncts) èn sa qualifitgadas per il final dal slopestyle. Höfflin è siglida sin il segund rang suenter la Norvegiaisa Johanne Killi. Betg sa qualifitgada per il final n'è percunter la Grischuna Giulia Tanno.
Umens
La qualificaziun per il final n'è stada nagin problem per Andri Ragettli. Cun 77,4 – respectiv 79,66 puncts – ha il Grischun mussà dus percurs sin fitg aut nivel, e mussà ch'el è en buna furma al Laax Open. Il meglier resultat da la qualificaziun è gartegià a l'Austriac Matej Svancer ch'è vegnì en in da ses percurs sin 80,80 puncts.
Sper Andri Ragettli han cun Fabian Bösch (73,45) e Valentin Morel (71,23) anc dus ulteriurs Svizzers dumagnà en il final dals 12 megliers skiunz. Il final dals freeskiers ha lieu dumengia.
Snowboard (halfpipe): 1 Svizzer e naginas Svizras
Umens
Jan Scherrer ha dumagnà sco 7avel en il final da la mesapipa. Il terz dals gieus olimpics a Peking ha mussà in ferm segund percurs, nua ch'el ha survegnì 84 puncts. Nagina schanza da dumagnar en il final da sonda han ils ulteriurs Svizzers gì. Elias Allenspach è vegnì 24avel e Gian Andrin Biele 25avel. Il final dals 12 megliers atlets ha lieu sonda saira.
Dunnas
Il final en la halfpipe sin il Crap Son Gion ha lieu senza snowboardistas svizras. En il mezfinal n'han Berenice Wicki ed Isabelle Lötscher betg pudì sa qualifitgar. Lötscher è crudada en 2 runs e Wicki en ses run decisiv, suenter avair cuntanschì plaz set suenter l'emprim run – omaduas tar in 720. Uschia ha il final lieu sonda senza Svizras.
Sco meglra sa qualifitgada per il final è la Giapunaisa Mitsuki Ono cun 89,50 puncts, suandada da la Chinaisa Shaotong Wu (89,00) e l'Americana Maddie Mastro (82,50). Plinavant speranzas per gudagnar il final pon far Queralt Castellet (ESP), Elizabeth Hosking (CAN), Emily Arthur (AUS), Ruki Tomita (JPN) e Brooke Dhondt (CAN).
