Uzwil po procurar per ina surpraisa. Er sch'els n'han betg gì ina uschè buna situaziun, tegnan els la nulla cunter San Murezzan en l'emprim terz, e sajettan en il secund terz dus gols. Er sche San Murezzan fa anc in, n'hai betg tanschì per manar enturn la partida. La fin èsi stà 2:1 per Uzwil.
Mo duas giadas ha San Murezzan perdì enfin uss questa stagiun: cunter Weinfelden e Lai-Valbella. Ils hockeyans da Lai han franc observà il resultat da la davosa partida da San Murezzan, els èn numnadamain mo in punct sut ils Engiadinais sin plaz quatter cun 15 puncts. E la proxima partida vegn ad esser gest tranter quellas duas equipas, ils 13-12.
CdH Engiadina gudogna puspè
Il club da hockey Engiadina ha chattà enavos la via a la victoria. En il gieu a chasa cunter Weinfelden ha Engiadina persvadì e gudagnà cleramain cun 6:1. Uschia ha il CdH Engiadina surdà la laterna cotschna en la tabella a Weinfelden.
Il CdH Engiadina ha mo gudagnà duas partidas questa stagiun. Illnau-Effretikon e Kreuzlingen han dà sconfittas als giugadurs da l'Engiadina Bassa, ed er Lai-Valbella n'ha laschà nagina schanza ad els.
Partenz Signuradi cunter ils glischuns
En l'emprima liga ha Partenz Signuradi chattà enavos a la victoria. Els han gudagnà cun 4:2 ordaifer cunter ils Pikes Oberthurgau. La decisiun è crudada pir en il terz terz nua ch'il club dal Partenz ha fatg 4 gols.
Avant ha Partenz Signuradi gì inqual stgarpitschada suenter ina partenza admirabla en l'emprima liga. Suenter Burgdorf ha er Dübendorf battì els, e surpiglia la posiziun a la testa da la tabella.
Cuira cunter Lyss
Cuira suttastritga sia fermezza da chasa en la MySports League. Cunter l'SC Lyss gudogna Cuira cun 4:2.
Mo Huttwil ha questa stagiun pudì surmuntar ils da Cuira. Cun Huttwil concurrescha Cuira er per l'emprim plaz en la tabella da la My Hockey League. Sco l'onn passà, vegn dentant cunzunt ils playoffs ad esser il vair test per la furma. Lyss aveva avant la partida ina main buna bilantscha che Cuira, da las davosas 10 partidas han els mo gudagnà trais.
Arosa cunter Franches-Montagnes
L'EHC Arosa perda a chasa cunter il HC Franches-Montagnes cun 3:6. Il club dal chantun Giura è en la tabella duas plazzas davos Arosa, dentant betg da sutstimar.
