My Hockey League
EHC Cuira – EHC Seewen 3:1
Cuira ha cumenzà il gieu cunter Seewen sch'in chametg. Gia en l'emprim terz han ils Grischuns sajettà dus gols e dominà la partida. Al cumenzament dal davos terz ha Seewen scursanì, Cuira ha dentant reagì e sajettà var 3 minutas pli tard il gol decisiv.
EHC Bülach – EHC Arosa 1:4
Arosa ha cumenzà bain il gieu ordaifer a Bülach. Gia suenter trais minutas ha Andreas Tschudi sajettà ils Grischuns en avantatg. Ma lura èsi ditg stà ina battaglia ed en il segund terz ha Bülach pudì egualisar. Curt avant la fin dal segund terz è Arosa lura puspè ì en avantatg ed ha gist cuntinuà uschia en l'ultim terz cun il 1:3 suenter ina minuta dal terz.
1. liga
EHC Dübendorf – HC Partenz Signuradi 3:2
Il gieu tranter Partenz Signuradi e Dübendorf è stà fair cun paucs chastis. La gronda excepziun è stada in check cunter la banda ch'ha purtà ad in giugader da Dübendorf in chastì da 5 minutas – ed ultra da quai in chasti disciplinar uschia ch'el ha manchentà il rest dal gieu. La gronda part dal gieu è stà gulivà cun mintgamai in gol per Partenz Signuradi sco era per Dübendorf en l'emprim ed en il segund terz. Pir duas minutas avant la fin tutga Dübendorf al 3:2, e po anc cementar la victoria ina secunda avant la fin cun in sajet en il gol vid.
2. liga
EHC Dürnten – EHC Lai Valbella 4:3 suenter sajettar penaltis
Lai Valbella ha duvrà ditg per vegnir sin turas ordaifer cunter Dürnten. Gia suenter ina minuta è la squadra indigena ida en avantatg. Ed en il segund terz han ils da Dürnten er anc gartegià al 2:0. Ma curt suenter ha Romano Riedi sajettà l'emprim gol per Lai Valbella. Ed en l'ultim terz han ils Grischuns tratg suenter ed egualisà al 2:2 – e curt suenter anc ina giada al 3:3. La prolungaziun è passada senza gol. En il sajettar penaltis ha Dürnten lura fatg suenter bleras emprovas il gol decisiv.
EV Dielsdorf Niederhasli – EHC San Murezzan 4:2
San Murezzan n'ha betg pudì fitgar pe ordaifer cunter Dielsdorf Niederhasli. En l'emprim terz han els bain pudì egualisar ad 1:1. Ma en il segund terz han ils da la Bassa pudì ir en avantatg ed engrondir al 3:1. En l'ultim terz ha Dielsdorf anc augmentà al 4:1, uschia ch'il gol da Gian-Luca Ravo per San Murezzan curt avant la fin n'ha era midà nagut vi da la terrada.
EHC Uzwil – Cdh Engiadina 5:2
Suenter l'emprim terz eran ils Engiadinais cun dus gols en retard. Suenter 30 minutas èsi lura gartegià d'egualisar la partida aifer 20 secundas – tras dus gols da Patrick ed Andri Emmenegger. Uzwil ha dentant reagì svelt, e trenta secundas pli tard sajettà il 3:2. Curt avant la fin dal segund terz ha Uzwil marcà il quart gol, e sinaquai ha Nils Walter en il gol dal Cdh Engiadina fatg plaz a Men Noggler. Curt suenter il cumenzament dal davos terz ha Uzwil lura sajettà il gol al resultat final da 5:2.