L’istorgia da Ginia Caluori è strusch da crair. En curt temp è la sportista da Panaduz sa catapultada en il ravugl da las meglras mountainbikeras dal mund en sia categoria U23. Fin il 2020 era la giuvna da 21 onns anc sin via da far carriera da skis – lura però ha ella barattà ils skis cun il bike, e quai cun in nundetg success.
Ginia Caluori (21), Panaduz
Plazs da podest, er en la cuppa mundiala, èn oz quasi normal tar Ginia Caluori che descriva sa sezza sco resoluta, ambiziusa e focussada. Malgrà ch’ella n’ha anc betg l’experientscha sco las autras ch’han cumenzà gia baud cun il sport da mountainbike, s’auda ella gia uss tar las grondas favuritas sut 23 onns. Ses pli grond success fin oz è franc la medaglia d’argient en la cursa da cross-country als davos campiunadis mundials il 2023 a Glasgow en la Scozia. Caluori fa er part dal cader naziunal da Swiss Cycling.
Sut contract tar Wilier-Vittoria MTB Factory Team
Grazia a sias bunas prestaziuns la stagiun passada ha Ginia Caluori er survegnì diversas offertas per in contract da profi. La finala è ella sa decidia da midar tar l’equipa taliana Wilier-Vittoria MTB Factory Team, ina equipa che vul s’avanzar ils proxims onns sut las top 5 equipas dal mund e cumbatter per medaglias als gieus olimpics il 2028 a Los Angeles.
Igl è propi cool. Jau ma sent fitg bain en la nova equipa, jau hai buna glieud enturn mai, in super support ed i na pudess betg esser meglier.
Lantschà sia carriera ha Ginia Caluori cunzunt tar l’equipa da Thömus Youngstars, nua ch’ella è stada sut contract ils davos dus onns. Dasper la carriera sco mountainbikera frequenta la giuvna da Panaduz anc in studi a distanza en il sectur scienza da sport. La gronda finamira a lunga vista è da pudair preschentar in di la Svizra a gieus olimpics.
