Ils dus frars Florian e Linus Haller dad Ardez ardan pet il hockey. Omadus han emprendì l’amulain da hockey en la scola da hockey e tar il CDH Engiadina. Omadus han lura gì cun 14 onns fatg il pass en la partiziun da juniors dal Club da hockey da Tavau, ed omadus han lura era fatg il pass tar il hockey dals creschids tar l'EHC Arosa.
Florian Haller è dus onns pli vegl che Linus Haller, perquai han els dà mo ina stagiun, la stagiun 2021/2022 cun l’elita U20 dal HCD ensemen in campiunadi. Per paucas fissi uss vegnì a la reuniun dals dus frars tar l'EHC Arosa. Ina ferida dal goli Florian Haller ha dentant terminà quest siemi.
Jau vai chattà tar l'EHC Arosa amis per la vita.
Ferida dal meniscus, operaziun e fin da la carriera
Dapi duas stagiuns ha il frar pli vegl, Florian Haller, in contract cun l'EHC Arosa. Adina puspè è il goli engiadinais dentant vegnì frenà. Il pli ferm il settember da l’onn passà, nua che Florian Haller ha rut suenter in culp sin in schanugl il meniscus. L’emprima operaziun dal meniscus n'è betg gartegiada tenor giavisch, uschia ch'il goli ha stuì sa suttametter ad ina segunda operaziun. Quella è gartegiada meglier, dentant ha il giuven goli stuì decider da terminar sia carriera e da metter la mandura dal goli da la vart. La ferida na lubescha betg pli da dar hockey sin quest livel. Exact durant quel temp che Florian Haller s'ha stuì far patratgs davart il futur da sia carriera ha il frar giuven Linus Haller suttascrit in contract dad in onn cun l'EHC Arosa. Quai fiss stà puspè l’emprima giada ch'ils dus frars avessan dà hockey en la medema equipa.
Er Linus Haller ha decidì da far il pass tar l'EHC Arosa
Suenter che Florian Haller ha stuì terminar sia carriera ha Linus Haller decidì da far il medem sco il frar vegl ed ha suttascrit tar l'EHC Arosa. Er el vul far il pass tar il hockey dals creschids tar l’equipa da tradiziun grischuna. Linus Haller era la stagiun passada part da l’equipa d’elita U20 dal HCD ed ha uss vulì far il proxim pass. Tenor ses avis è el fisicamain memia ferm per dar anc ina stagiun cun l’equipa dad U20 dal HCD, perquai è el sa descidì dad ir questa via. Bel fissi stà da far quai ensemen cun il frar vegl Florian Haller. Pervia da la sanadad ha quel dentant stuì terminar sia carriera.
L’influenza dal frar vegl da far il pass tar l'EHC Arosa era gronda.