Cun 35 onns è Eligius Tambornino stà il pli vegl a la partenza da las cursas da la Cuppa IBU a Lai, cursas internaziunalas da biatlon da la segunda auta categoria suenter quellas da la Cuppa mundiala. Bun dus decennis è il sportist oriund da Trun stà fidaivel al sport da prestaziun, l’emprim sco spezialist da sprint en il passlung e suenter ils gieus olimpics il 2014 a Sotschi sco biatlet.
Il trenar sulet n’è stà nagin handicap. Uschia hai jau pudì far gist quai ch’jau hai mess avant e pudì focusar sin mamez.
Avant bun in onn è Tambornino vegnì tramess dal cader naziunal da Swiss Ski enavos en il cader regiunal. Sulet e per gronda part sin agen cust ha el tuttina anc ina giada empruvà tut. La finala n’èsi betg ì sco giavischà en questa davosa stagiun da la carriera. Il siemi era er da pudair sa participar als gieus olimpics a Peking.
Dal Maraton engiadinais als campiunadis svizzers
Avant che dar adia vul Eligius Tambornino anc attatgar a bain inqual cursa. En in’emna vul il Sursilvan parter al Maraton da l’Engiadina, lura sa participar principal la fin mars a la cursa da 50 kilometers dal campiunadi svizzer da passlung a Sparenmoos en la vischinanza da Zweisimmen, e l’entschatta avrigl stat anc sin il program a Realp il campiunadi svizzer da biatlon.