La terza liga da hockey è la liga da las equipas engiadinaisas. Sper las tschintg equipas engiadinaisas vegnan anc vitiers las equipas da Poschiavo, da Bregaglia e dad Alvra. Uschia è quasi mintga partida en terza liga in derbi. Exact quai è era ina da las fascinaziuns da la terza liga da hockey.
Samedan, Poschiavo e Zernez a la testa
Ils davos onns era quest trio adina davantvart da la partida. Er durant questa stagiun è quai il cas. Il EHC Samedan è actualmain il leader da la terza liga ed emprova da terminar la qualificaziun sin questa posiziun. La squadra da l’Engiadina Ota è durant ils ultims onns adina stada fitg ferma. L’equipa profitescha da l’atgna scola da hockey, da las atgnas equipas da juniors e dal fatg che inqual giugader che ha dat hockey en ina autra equipa turna per la fin da la carriera anc ina giada tar il EHC Samedan. Blers giugaders che han dà diversas stagiuns, per exempel tar il EHC San Murezzan, en segunda liga èn turnads per la fin da la carriera anc ina giada a Samedan. Ils davos onns ha la squadra segir profità da quest svilup. E segir er pervia da quai è l’equipa actualmain uschia ferma.
CDH La Plaiv cumbatta per surviver
Anc avant paucs onns era il CDH La Plaiv ina ferma equipa da la terza liga. Lura dentant han blers giugaders pli vegls terminà lur carrieras e nagin è vegni suenter. Quai ha laschà enavos ina fora tar il CDH La Plaiv. Be cun paucs giugaders n'èsi betg pussaivel da dar bain hockey. Uschia è l’equipa crudada adina dapli. Las davosas stagiuns ha la squadra adina purtà la laterna cotschna. E sche la terza liga na fiss betg ina liga serrada, vul dir ch'i na dat nagina equipa che vegn reelegida, alura fiss il CDH La Plaiv segir crudà anc ina liga pli bass.
Il grond problem da La Plaiv è ch’il club n'ha nagina scola da hockey ed era nagina partiziun da juniors. Il club consista mo da giugaders creschids che dattan il campiunadi en terza liga e quels eran stgars ils davos onns. Cun ina acziun da reclama ha il CDH La Plaiv empruvà da gudagnar novs giugaders, uschia che ins sa uss almain giugar las partidas cun diesch giugaders. Suenter in temp difficil vai plaunet ensi. La proxima finamira fiss da gudagnar durant questa stagiun in gieu en terza liga e cun pitschens pass puspè da fabritgar si in'equipa cumpetitiva.