Il Tujetschin lantscha sia stagiun da passlung cun sa participar a las cursas dal Swiss Cup ils 2 e 3 da december a Surlej/Silvaplauna en l’Engiadin’Ota. La finamira en questa stagiun saja dentant er da pudair ir magari a la partenza a cursas da la cuppa mundiala. Quella ha gia cumenzà la davosa fin d’emna a Kuusamo en la Finlanda. Il grond giavisch fiss da survegnir questa schanza la fin da schaner a las cursas da la cuppa mundiala a Goms en il Vallais. Quai fiss quasi tar el davant chasa, di il passlunghist da 22 onns ch’abitescha a Sedrun.
En vista a la nova stagiun ha Cla-Ursin Nufer mess il focus sin la tecnica, quai tant en il stil liber sco er en il stil classic. Tecnicamain veglia el far in pass pli datiers als megliers dals megliers. Mussar che tut quella lavur – nua ch'i va savens per finezzas, detagls, per millimeters – haja er purtà insatge, vul il Tujetschin lura principalmain a ses davos campiunadis mundials dals U23 il favrer a Planica en la Slovenia. La finamira saja da cuntanscher a quest punct culminant da la stagiun in plaz sut ils top 6 – il siemi fissi da schizunt turnar a chasa cun ina medaglia.