Gia durant l’entira stagiun era il cumbat per ina plazza da playoff en segunda liga fitg stretg. Ditg era la terza equipa grischuna da la segunda liga sin ina plazza da playoff. L’ultim gieu ha dentant decidì cunter il CDH Engiadina. L’adversari il pli fervent per ina plazza da playoff, il SC Weinfelden, ha gudagnà sia davosa partida encunter Dürnten cun 4:3 en la prolungaziun. Il CDH Engiadina percunter ha pers l’ultim gieu cun 6:9 cunter Illnau Effretikon.
Il CDH Engiadina n'è anc betg salvà en segunda liga
Ina plazza da playoff – vul dir ina plazza tranter las meglras otg equipas da la segunda liga – è tant impurtanta per il CDH Engiadina, perquai ch'ina plazza da playoff vul era dir, che la squadra è salvada en segunda liga. Pervi dad in solit punct manchenta il CDH Engiadina questa finamira ed ha uss dad ir la via sur la relegaziun.
