Tgi che vul vegnir vinavant en il sport, quel e quella sto trenar bler. E tar ils canuts dal Club da canu da Cuira vala quai per l'enviern sco la stad, di sco notg e bell'aura sco era mal'aura. Almain duas giadas l'emna treneschan els sin l'aua, il bler a Rehanau sin il Rain. Gist dasper la staziun è lur magasin e da là ston els chaminar var 10 minutas a pe fin ch'els èn en l'aua.
Quatter giuvens e trais giuvnas èn part dal cader e la gronda part è en la scola da talents da sport u sumegliant. Perquai n'èsi nagin problem da trenar era durant l'emna durant il di ora.
Era da notg e fin dus grads
In lieu da trenament che nus accumpagnain è la saira a Trin Mulin en il pitschen lai da fermada da Pintrun. Igl ha stgars trais grads – en l'aria sco er en l'aua. Ma ils canuts èn disads e cun l'endretga vestgadira va quai bain da trenar d'enviern la saira en il fraid: «Jau tir en dus Odlos ed ina giacca suren nua che l'aua na vegn betg tras sco anc guants. Quai n'è betg uschè bler, ma sch'ins sa mova, lura basta quai», di Carla Rhein da Trin. Ella era gia cun tschintg onns l'emprima giada en in canu sin l'aua. Era per ils auters canuts n'emporti betg grond, sch'igl è fraid:
Ensasez èsi gea in sport da stad e betg enviern. Ma sch'ins vul esser bun, lura ston ins era trenar d'enviern. Jau hai schon era plaschair da trenar en il fraid, igl è auter.
I dat dis nua ch'jau pens, pertge fatsch jau quai. Ma cu jau sun sin l'aua, lura fai mega plaschair. E quai mintga giada.
-
Bild 1 von 4. Trenament da saira. Sin il pitschen lai da fermada da Pintrun a Trin Mulin èn ils canuts s'installads cun in pitschen percurs da slalom. Bildquelle: RTR.
-
Bild 2 von 4. Trenament sin il Rain. Sin il flum treneschan els cundiziun. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Betg simpel da chattar lieus adattads
Il trenament da tecnica a Trin Mulin pussibilitescha ad els, da vegnir pli precis e svelt enturn las pitgas, sco quai ch'i vegn pretendì en las cursas. A Rehanau sin il flum treneschan els cundiziun. E dasperas èn els er anc ina giada l'emna en il bogn cuvretg. Chattar lieus adattads per trenar n'è gnanc uschè simpel, manegia il trenader:
Quai è ina gronda sfida. Nus essan londervì gia plirs onns per chattar in bun lieu da trenament cun buns currents.
10 onns è il trenader Ralph Rhein, oriund da Basilea, stà en la squadra naziunala Svizra da canu. Uschia po el dar vinavant blers tips e trics a ses scolars. E che ses canuts han uschè grondas ambiziuns en quest sport, fa plaschair ad el.
La finamira per quest onn è da ma qualifitgar per ils campiunadis mundials dals juniors.
Jau ma vuless participar als campiunadis mundials ed ils europeics en la Slovachia quest onn.
Il grond eveniment, sin qual els treneschan è la selecziun per ils campiunadis mundials da juniors en l'Alsazia en la Frantscha il mars 2025.
Or da l'archiv: