Cun Cla Mosca da Scuol l’onn 1993 ha il chantun Grischun gì l’emprim campiun mundial da snowboard. Tar il campiunadi mundial ad Ischgl en l’Austria aveva il snowboardist gudagnà il titel da campiun mundial en la disciplina snowboard alpin. En la mesa pipa mussava Reto Lamm da Puntraschigna trics spectaculars. El è vegni vice campiun mundial als campiunadis mundials l’onn 1995 a Tavau.
E be dus onns pli tard ha il frar giuven da Cla Mosca, Fadri Mosca fatg il medem sco ses frar. Il 1997 a Heavenly en il Stadis Unis ha er el pudì festivar il titel da campiun mundial. Il punct culminant dals emprims onns dal sport da snowboard è alura stà il titel da campiun olimpic als Gieus Olimpics da Nagano da Gian Simmen dad Arosa.
![Gian Simmen und Uli Kestenholz in Nagano](https://www.rtr.ch/static/cms/images/960w/31a2efd.jpg)
Ils pioniers e lur ierta
La scena da snowboard en il Grischun è creschida spert durant ils emprims onns. Suenter ils gronds success dals frars Mosca, da Reto Lamm e da Gian Simmen èn alura ulteriuras Grischunas e Grischuns creschids ed èn daventads classa mundiala. Daniela Meuli da Tavau ha gudagnà cursas e medaglias en seria, Ursina Haller da Zernez ha era procurà per puncts culminants dal sport da snowboard grischun ed er Manuela Pesko da Lai. Per ils davos gronds success e titels è alura Nevin Galmarini dad Ardez stà responsabel.
Scena da snowboard grischuna fitg activa
Parallel cun tut quests success da snowboardistas e snowboardists grischuns èn era creschidas occurrenzas. Davent da l’entschatta han Laax e la regiun da l’Arena Alva mess sin la carta da snowboard. Cun il Laax Open è s'etablì en il Grischun ina da las grondas occurrenzas da snowboard insumma.
![Yuto Totsuka im Final des Laax Open](https://www.rtr.ch/static/cms/images/960w/25aaf54.jpg)
Ils success da Nevin Galmarini ha procurà che la cuppa mundiala da snowboard alpin è s’etablida cun cursas a Scuol e l'exempel il pli nov è il contest dal Big Air a Cuira, nua che las meglras atletas ed ils megliers atlets da big air e da freestyle procuran per sigls spectaculars sin l’areal da la Obere Au en la chapitala grischuna.
RTR mussa il Big Air live
Il Big Air stat per sport spectacular e musica che lascha tremblir l'areal da l'Obere Au. Cun RTR pudais persequitar ils acts ed il sport da freeski e snowboard.
![Big Air Livestream](https://www.rtr.ch/static/cms/images/960w/4db582.jpg)