Fraid, fradaglia, Sclamischot. La pitschna fracziun tranter Strada e Martina è gia per la terza giada lieu d’occurrenza da la cuppa Svizra da biatlon. Quai è la seria da cursas che maina la famiglia da biatlon tras tut la Svizra. Uschia er per la terza giada en Engiadina Bassa. En l’arena da biatlon da Sclamischot, ch’è vegnida construida ils davos onns ed adina puspè adattada als basegns da las atletas e dals atlets, hai puspè dà cursas da l’elita, dentant er dad uffants e giuvenils.
Al limit pervia da las temperaturas fitg fraidas
Il termometer mussava circa -16 u -17 grads la damaun cura che las emprimas atletas ed ils emprims atlets èn vegnids tramess sin la loipa a Sclamischot. Pervia da las temperaturas fitg bassas er’ins a Sclamischot al limit. Tant pli impurtant è perquai la preparaziun sin ina tala cursa, e las pussaivladads da sa stgaudar avant, durant e suenter las cursas. Inqual atleta n'è pervia da las temperaturas bassas gnanc vegnì a la partenza. Blers han dentant tuttina fatg part a las differentas cursas.
La famiglia da biatlon crescha adina pli fitg
L’arena da biatlon a Sclamischot è vegnida construida dad entusiasts da quest sport. L’arena, las loipas e l'implant da tir èn adina puspè vegnidas adattadas, uschia sa preschenta l’arena da biatlon a Sclamischot uss sco ina pitschna oasa da quest sport. La Societad da biatlon Sclamischot ha cumenzà cun set atletas ed atlets. Entant fan circa 20 uffants e giuvenils part a la societad. Era grazia las concurrenzas da la cuppa svizra da biatlon, ch’en la fin d’emna gia per la terza giada en Engiadina Bassa.
