Il plaschair da primavaira era grond tar Valposchiavo Calcio. Durant la penultima partida dal champiunadi ha Valposchiavo fatg tut cler. Cun ina victoria encunter Eschen Mauren ha l’equipa dal Grischun talian pudì gudagnar il campiunadi ed uschia far il pass ina liga amunt, da la terza ensi en la segunda liga. Suenter 18 onns è Valposchiavo uschia puspè enavos en segunda liga.
Nus n'avessan betg spetgà ina partenza uschè positiva, malgrà che nus savevan che la squadra ha il potenzial da mussar bunas prestaziuns.
Vegnì ensi per restar
Il cumenzament dal nov campiunadi da ballape en segunda liga è gartegià a Valposchiavo Calcio. Las emprimas duas partidas dal nov campiunadi ha l’equipa dal trenader Luigi Zugnoni gudagnà. Pir en la terza partida ha la squadra stuì magunar ina terrada. Or da sconfittas emprendan ins anc dapli sco sche ins gudogna partidas da ballape. Uschia sa disa la squadra al tempo e l’intensitad da la segunda liga. La finamira principala è numnadamain da pudair sa salvar en segunda liga, da pudair restar en questa liga. Avant 18 onns, cura che Valposchiavo Calcio era promovì per l’emprima giada en segunda liga, è l’equipa vegnida relegada a la fin da la stagiun.
Equipa quasi medema
Ils mais da stad ha er Valposchiavo Calcio duvrà per metter ensemen la squadra che dat il campiunadi en segunda liga. Per fortuna n'hai betg dà gronds midaments en l’equipa. En sasez han ins be stuì ir a la tschertga da dus giugaders novs, in giugader da champ d’amez ed in defensur. Gist suenter la promoziun ha Valposchiavo Calcio er pudì reglar la persunalia dal trenader. Luigi Zugnoni ch’è uss gia tschintg onns il trenader da l’equipa, ha lura decidì da restar vinavant.
