Flavio Deflorin ha accumpagnà las dunnas dal team da Domat durant lur preparaziuns sin la Cuppa grischuna ch'ha gì lieu ils 18 da matg. La finamira è stada da batter il rival enconuschent – il team da Tusaun/Cazas. Ma ballape na dattan las dunnas da Domat betg mo cun talent e strategia, mabain er cun in bun team. Il spiert da gruppa, ina da las grondas fermezzas dal club da ballape da Domat.
Il team da dunnas dal CB Domat
Dapi passa 20 onns datti il club da dunnas dal CB Domat. L'onn 1996 han pionieras entschet a trenar ed a partir da la sessiun 1998/99 han ellas era cumenzà a dar il campiunadi. Bain spert fascheva l'equipa da dunnas cumplainamain part al club. Ozendi giaudan ellas gronda simpatia entaifer il club, di il trenader Daniel Casanova. Quai demussian las autas cifras dad aspectaturs tar ils gieus a chasa. Il team gioga en la segunda liga ed ha quest onn puspè pudì furmar in team da junioras.
Romina Cavegn – dapi dacurt part dal team
La Lumneziana Romina Cavegn tutga tar las giuvnas dal team. Ella è dapi la stagiun 2022 part da la squadra da Domat. Ella vegn per mintga trenament da Vella a Domat e ballape saja adinà stà in grond tema tar els en famiglia.
Leonore Holstein – Power en l’ala
Leonore Holstein è gia dapi sis onns tar il CB Domat ed è ina giugadra da tschep. Enfin ch'ella ha gì 14 onns ha ella abità a Sedrun e dà cun il team Surselva. Ussa abità ella a Tumein e studegia a Son Gagl, là nua ch’ella ha er gia dà ballape – cun il FC Son Gagl.
Nicole Gartmann – la chapitania cun experientscha
La chapitania Nicole Gartmann ha cumenzà sia carriera da ballape tar il CB Laax cun 14 onns. Là ha ella dà 12 onns enfin ch’ella ha midà tar il CB Domat il 2012. Ussa tutga ella tar las giugadras cun la blera experientscha.
Daniel Casanova – trenader dapi 21 onns
In trenader cun corp ed olma. El ha cumenzà cun sis onns a dar ballape e bainprest lur daventà goli tar il CB Domat. Daniel Casanova è trenader da las dunnas tar il CB Domat dapi 21 onns, part dal CB Domat è el gia dapi 42 onns.
La cuppa Grischuna
La Cuppa grischuna è segir in dals highlights dal team da Domat. E cun quest highlight vegn era il rival enconuschent – Il team da dunnas Tusaun/Cazas. Il team da Domat ha gia dà siat giadas en il final da la Cuppa grischuna cunter il CB Tusaun/Cazas, sulet il 2021 ha Domat dumagnà da batter Tusaun. Tuttina na saja il final mai rutina, i saja mintga giada puspè insatge spezial e tut auter ch'in normal gieu da campiunadi.
Per il trenader èsi er impurtant che l'equipa n'emblida betg da giudair quest final. Il mintgadi turna numnadamain spert puspè. Er sche Tusaun ha gudagnà en in drama da penaltis la cuppa grischuna 2023, ha il Team da Domat pudì sa legrar ina fin d’emna suenter. Ellas han dumagnà da restar en la segunda liga dal campiunadi. In ulteriur success per il ballape da dunnas è medemamain ch’igl è stà pussaivel da crear ina gruppa da junioras per la stagiun 2023.