Sco sportist activ n’ha Jürg Capol mai dastgà sa participar ad ina occurrenza gronda en Svizra. L’anteriur passlunghist ha tranter il 1986 ed il 1994 fatg part duas giadas a gieus olimpics e trais giadas a campiunadis mundials da ski nordic. Ma quels events han tuts gì lieu en l’exteriur.
Il favrer va il siemi d'in eveniment grond da sport en l’agen pajais tuttina anc en vigur per l'anteriur profi da Cuira. Tar ils campiunadis mundials da biatlon, dals 12 fin ils 23 da favrer 2025, n’è Capol che ha 59 onns betg a la partenza sco atlet. Però sco CEO da quest event è el tuttina involvì fitg.
La finamira èn 55’000 aspectaturs
«Nus essan là, nua che nus avain dad esser», di Jürg Capol davart las preparativas bun trais mais avant il sajet da partenza. Il CEO grischun è da buna speranza che tut vegn bun. «En la davosa fasa èsi da svegliar in'euforia», agiuntescha Capol.
Enfin oz han ils organisaturs vendì 24’000 bigliets. La finamira budgetada è da vender 55’000 bigliets sur tut ils 9 dis da cursa, quai per la finala betg scriver cifras cotschnas. Ils organisaturs quintan che duas terzas dals fans derivan da la Svizra. Success svizzers er en la cuppa mundiala, che cumenza la fin november en la Finlanda, gidassan d’augmentar l’interess dals aspectaturs per quests campiunadis mundials 2025 a Lai.
Cuppa mundiala ha furnì datas impurtantas
Il december 2023 ha Lai dastgà organisar per l’emprima giada cursas da la cuppa mundiala da biatlon. Quellas han valì sco l’emprova generala per ils campiunadis mundials. «Grazia a questas cursas avant in onn avain nus vesì tge che funcziuna e tge che nus stuain midar», uschia Jürg Capol. Adattaziuns han ils organisaturs cunzunt fatg quai che pertutga il traffic e l’entrada tar l’arena da biatlon. La finamira è da transportar uschè blera glieud sco pussibel cun bus da shuttle davent da Tusaun via Casti a Lai. La via principala tranter Cuira e Lai vegn ad avair in traffic enorm, er perquai che quests campiunadis mundials è amez la stagiun auta d’enviern, lura cura ch’i ha gia millis da turists a Lai.
Trio grischun sa legra sin quests campiunadis mundials da chasa
Per biatletas e biatlets svizzers èn quai campiunadis mundials tut spezials. Pudair cumbatter per medaglias a chasa, avant ils fans da chasa en l’arena da biatlon a Lai, là nua ch’i vegn trenà la gronda part, insatge che blers atlets svizzers avessan be siemià anc avant intgins onns. Spezial èsi cunzunt per las duas soras Aita ed Elisa Gasparin che vivan a Lantsch. Per ellas èn quai propi cursas da chasa, en il vair senn dal pled. La terza grischuna che pudess ir a la partenza a quests campiunadis mundials è Lea Meier dal Partenz. E la giuvna da 23 onns ha bunas regurdientschas vi da Lai. Il 2020 è ella vegnida en quest’arena da chasa campiunessa mundiala tar las junioras.
