20 equipas han scuà - Il campiun grischun da curling vegn da Lai

Gia per la 50avla giada hai dà il campiunadi grischun da curling. Questa giada è la gronda famiglia da curling s'inscuntrada a Tschierv tar il CC Val Müstair. In dals clubs grischuns ils pli giuvens. Il CC Val Müstair datti dapi 10 onns. Durant dus dis han las 20 equipas da curling grischunas mussà sport dad auta qualitad. Er las temperaturas magari frestgas n'han betg impedì buns duels sin il pli aut livel.  

Final cun ina equipa da dunnas

Suenter quatter gieus era cler che l’equipa da Lai dat il final per il titel cunter l’equipa da las dunnas dal CC San Murezzan. Lai è ì durant ils emprims ends en avantatg, lura dentant è San Murezzan turnà en il gieu. A la fin n'hai dentant betg tanschì. Lai ha gudagnà il gieu da final cun 8:6 ed uschia il titel da campiun grischun.  

Impressiuns dal campiunadi GR da curling

Turnier impurtant per il CC Val Müstair

Per l’emprima giada ha la Val Müstair organisà in campiunadi grischun da curling. E quai lura gist sin il campiunadi da giubileum da 50 onns. Il CC Val Müstair festivescha quest schaner ses 10avel anniversari, uschia ch'il campiunadi grischun è er in zichel in regal d’anniversari. Er en Val Müstair vegnan il club ed il sport adina pli populars. Forsa che la vaidrina dal campiunadi grischun carmala in u l’auter en il club e tar il sport ch'ins gioga cun crap e scua.