Per il campiunadi europeic da l'onn che vegn en la Germania è la Svizra gia sa qualifitgada la sonda cun il 1:1 cunter il Cosovo. En l'ultima partida la qualificaziun dal mardi èsi surtut ì per plaz 1 da la gruppa. Quel è ussa ì a la Rumenia. La Svizra perda cun 0:1 . Malgrà 59% possess da la balla n'èsi betg gartegia als Svizzers da far in gol. Ils Rumen Denis Alibec ha fatg il sulet gol da la partida en la 50avla minuta. La Svizra finescha uschia sin plaz dus da la gruppa I.
Murat Yakin vinavant sut squitsch
Da las ultimas set partidas ha la Svizra be battì l'Andorra, giugà tschintg giadas pari ed ussa er anc pers in. Tras quests resultats è er il trenader Murat Yakin vegnì sut squitsch, tscherts fans pretendan ch'el vegnia remplazzà. Yakin ha empruvà da reagir ed ha midà ora quatter giugaders per il gieu cunter la Rumenia, la trumpada vegn ussa dentant ad augmentar il squitsch sin il trenader.
Gruppa pli greva per la Svizra
Ils 2 da december vegn tratga la sort per las gruppas dal campiunadi europeic. Cun quai che la Svizra finescha sin plaz dus da la gruppa vegn ella en la cuppa quatter, quella cun la squadras las pli deblas. Cun quai spetgan megliers adversaris or da las autras trais cuppas sin la Svizra en la gruppa dal campiunadi europeic.
- Cuppa 1: Germania, Portugal, Frantscha, Spagna, Beglia, Engalterra
- Cuppa 2: Ungaria, Tirchia, Danemarc, Albania, Rumenia, Austria
- Cuppa 3: Ollanda, Scozia, Slovenia, Slovachia, Tschechia, Croazia
- Cuppa 4: Italia, Serbia, Svizra, *
* Per ils ultims trais plaz datti anc playoffs
Il campiunadi europeic vegn ad avair lieu dals 14 da zercladur fin ils 14 da fanadur 2024 en la Germania.
