La Svizra è ina giada dapli sa qualifitgada per in turnier grond. Dapi l'onn 2004 ha la naziunala svizra manchentà be ina giada ina runda finala. Il campiunadi europeic dal 2012 en l’Ucraina e la Pologna.
Igl è dentant stà ina qualificaziun ch'ha strapatschà la gnerva. Er encunter il Cosovo ha la truppa da trenader Murat Yakin dà or da maun la victoria. Suenter il gol da Rubens Vargas, curt suenter pausa, han ils Cosovars egualisà 10 minutas avant la fin. Quest 1 ad 1 ha dentant tanschì per sa qualifitgar per il campiunadi europeic da l'autra stad en Germania. En l'ultim gieu da gruppa (21-11-2023) a Bukarest encunter la Rumenia vai anc per l'emprim plaz da gruppa. Sin quest emprim plaz èn da nov ils Rumens, suenter lur victoria da 2 ad 1 encunter l'Israel. L'emprim plaz da gruppa en quella campagna europeica è impurtant per avair ina meglra situaziun da partenza cura ch'i vegn tratg la sort tgi encunter tgi al campiunadi europeic. Per vegnir emprims da gruppa stuessans ils Svizzers dentant batter ils Rumens.
Magra qualificaziun – in bun omen?
Encunter adversaris da gruppa cler pli flaivels che la Svizra èsi ì vess a la naziunala da dominar e surtut gudagnar ils gieus. Bain ha l'equipa spers nagina partida en quella qualificaziun, dentant èn plirs gieus ids a fin be cun in pari empè dals 3 puncts avisai. Malsegirtad è sa derasada e l'entira qualificaziun che pareva il cumenzament simpla è daventada stentusa ed è ida in pau pe zopp. Era gia la qualificaziun per l'Euro 2021 è vegnida titulada sco stentusa e curiusa. E nus sa regurdain, a lez campiunadi europeic ha la naziunala svizra dumagnà fin en il quartfinal.
Prevista Svizra – Cosovo
Nizzegia la naziunala svizra la segunda balla da matsch u sto l'ultim gieu encunter la Rumenia decider la qualificaziun per l'Euro 2024? L'ensemble da trenader Murat Yakin vul scadin cas evitar il showdown a Bucarest e far tut cler en il gieu a chasa encunter il Cosovo. Tge che munta che la Svizra sto batter ils Cosovars.
Squitsch mental
En la «campagna europeica» ha la Svizra gudagnà be in dals ultims tschintg gieus. Las partidas encunter la Rumenia, il Cosovo, il Belarus e l'Israel èn idas a fin cun paris ed uschia adina be cun in punct per la naziunala. En il gieu da la Svizra è sa schluità in muster negativ. Malgrà esser favurits, ha l'equipa en la segunda mesadad adina laschà suenter ed incassà gols, savens en la fasa finala. Surtut en l'ultim gieu encunter l'Israel han ins pudì constatar ch'ina tscherta malsegirtad è sa derasada. Ils dus ultims gieus da qualificaziun per il campiunadi europeic daventan uschia era ina chaussa dal chau per ils ballapedists svizzers.
Adversari motivà
Svizra-Cosovo è adina ina fischa speziala, plain emoziuns e cun in'atmosfera tendida. Quai na vegn betg ad esser auter questa saira en il stadion St. Jakob a Basilea ch'è gia daditg vendì ora. Suenter ch'ils Cosovars han battì avant in'emna l'Israel han els mantegnì en vita la pitschna schanza dad er anc sa qualifitgar per il campiunadi europeic. Il Cosovo stuess batter la Svizra ed il Belarus. E plinavant èn ins era anc avisà sin agid da la Rumenia.
