Dals 22 fin ils 26 da fanadur vegnan 34 giugadurs svizzers introducids en il sistem ed en la filosofia da Patrick Fischer al «Prospect Camp». Ina mesadad da quels n'ha anc mai giugà per la squadra naziunala.
In dals newcomers – Fabian Ritzmann
Il giuven da 22 onns è part dal «Prospect Camp». Sia carriera ha el cumenzà en l'Engiadina, numnadamain tar il CdH Engiadina. Suenter ha el giugà per il HCD e quai tschintg onns. Sia via ha dentant manà vers Berna. Gia dapi la stagiun 22/23 è Fabian Ritzmann attatgader per il SC Bern. Ussa survegn el la schanza da far in pass en direcziun dal team naziunal A.
Ils trenaments sajan intensivs, di il giuven da 22 onns. Ma el vesa quai camp era sco ina schanza:
Igl è bun d'esser qua cun ils megliers giugaders da la Svizra. Durant quest'emna intensiva pon ins emprender bler dals auters sin il glatsch. Igl è er ina plattafurma per sa mussar per la squadra naziunala svizra.
34 giugaders ha il trenader naziunal Patrick Fischer clamà per il «Prospect Camp» dals 22 fin ils 26 da fanadur 2024 a Tavau. Talents or da l'entira Svizra ch'han potenzial da far in pass en il cader dal team naziunal A.
