Dapi mais fan Markus Wolf e Ruth Metzler cumbat electoral per la successiun da Jürg Stahl en il pli aut uffizi dal sport svizzer. Els van da hearing tar hearing, crusch e travers tras la Svizra. Preschentan lur fermezzas e lur ideas a las uniuns, federaziuns ed organisaziuns da sport. L'elecziun ch'il parlament da sport fa ils 22 da november vegn era ad avair caracter da signal, esser ina sort mussavia, en tge direcziun ch'i duai ir cun il sport en noss pajais.
Derivanza e posiziuns cumplet differentas
Markus Wolf viva cun sia famiglia a Cuira. El ha dà unihoc en la pli auta liga svizra, è stà trenader da la naziunala d'unihoc. Ha lavurà sco directur da sport e CEO da Swiss Ski. Ils ultims onns, fin la fin dal 2023, è el stà CEO tar las pendicularas da l'Arena Alva a Laax. In candidat ch'ha fatg e vis bler en il mund da sport. Da sias experientschas e sia enorma savida duai il sport profitar. Gugent en la posiziun sco futur president da Swiss Olympic, ch'è l'uniun tetgala dal sport svizzer ed il comité olimpic naziunal. Sport è sia pissiun, di Markus Wolf. El vul muventar cura ch'i va per la finanziaziun dal sport, temas strategics u era la posiziun dal sport. Swiss Olympic stoppi vegnir pli effizient. Markus Wolf è persvadì ch'i dovra per las sfidas futuras ina persuna dal sport a la testa e betg ina politicra. Bain savend ch'i na vegn betg simpel encunter l'anteriura cussegliera federala Ruth Metzler. Era sche quella è ina sort «noviza» sin la gronda tribuna dal sport, è ella ina tacticra che sa co trair ils fils e che ha ina gronda rait da contacts schibain politics sco era en l'economia.
516 vuschs èn da surdar
Tantas vuschs han las 83 federaziuns e 30 organisaziuns da sport da surdar ils 22 da november. Las grondas federaziuns sco ballape, atletica, skis e gimnastica han las bleras. La primavaira ha Swiss Ski nominà e tramess en il cumbat electoral ses anteriur directur da sport e CEO, Markus Wolf. Il Grischun po era quintar cun il sustegn da Swiss Cycling, Swiss Ice Hokey e Swiss Unihockey. Ruth Metzler è vegnida nominada da la federaziun Swiss Athletics. Ella vegn era sustegnida da la federaziun da gimnastica e da ballamaun. Far ina prognosa davart schanzas e co il duel per il presidi da Swiss Olympic va a finir na vul nagin.
