Themen in diesem Newsticker
- Il HCD ha stuì tremblar, ma ha la finala dominà cunter il ZSC
- Temp per gieu dus dals mezfinals
- Nagina schanza per il HCD
- HCD cun in Sweep en il mezfinal
- Ina clera victoria per il HCD a Zug
- HCD gudogna era segund gieu dals playoffs
- HCD gudogna emprim gieu dals playoffs
Prevista: in'affischa tut speziala
Zug cunter Tavau è in'affischa tut speziala. Las duas equipas èn gia s’inscuntradas in pèr giadas en serias da playoff. Sut il trenader carismatic Arno Del Curto aveva il HCD per exempel pers il duel da final cunter Zug cura che quels èn vegnids l’emprima giada campiuns l’onn 1998. Diesch onns pli tard è alura reussida ad Arno del Curto la revantscha per il final pers l’onn 1998. Anc ina giada in per onns pli tard – suenter che Del Curto aveva bandunà l’equipa – ha il HCD puspè pers cunter l'EV Zug.
L’equipa da la stagiun 2021/22 pon ins cumparegliar il meglier cun l'EV Zug actual. Il trenader è anc adina Dan Tangnes, ed era l’equipa da l'EV Zug è per ina buna part quella ch'aveva bittà al HCD or dal mezfinal.
Tangnes vs. Holden
Spezial è l’affischa tranter l’EV Zug ed il HCD era pervi da l’inscunter dals trenaders Dan Tangnes e Josh Holden. Blers onns è Holden stà giugader tar l'EV Zug, e pli tard lura cun Dan Tangnes trenader. Perquai vegni interessant da vesair tgi dals dus trenaders ch'ha emprendì dapli u tgenin ch’è pli versà en ina seria da playoff nua ch'ins s'enconuscha in l’auter fitg bain. Sper l'inscunter tranter Tangnes e Holden datti era in inscunter per il goli Luca Hollenstein e per il defensur dal HCD, Nico Gross, ad in inscunter cun l’anteriura equipa.
Da vart da l'EV Zug han il goli Leonardo Genoni, ma era Gregory Hoffmann, Nando Eggenberger, Dario Simeon e Fabrice Herzog in passà tar il HCD.
Tut ils duels èn fitg stretgs
Gia durant la qualificaziun èn ils duels tranter las duas equipas stads fitg stretgs. Las emprimas duas partidas da qualificaziun ha il HCD gudagnà cunter l’EV Zug. Las davosas duas partidas èn alura idas a l'EV Zug. En general era il HCD anc meglier en furma durant l’emprima mesadad da la qualificaziun che durant la segunda mesadad. Dapi Nadal e la Cuppa Spengler n'è il HCD betg pli stà uschè effectiv sco anc avant la midada da l’onn. Uss è quai dentant tut tuttina. En il sport da hockey di ins numnadamain: cun ils playoffs cumenza il campiunadi da nov.
