Nino Schurter ha pers be 4 secundas sin il Franzos Victor Koretzky ch’ha gudagnà questa cursa da test piz a cup avant Anton Cooper da la Nova Zelanda. Cuntanschì l’arrivada sco quart ha in ulteriur favurit, il Franzos Jordan Sarrou cun in retard da 14 secundas.
Betg ì sco giavischà u anc betg laschar mirar en las cartas han Mathieu van der Poel e Thomas Pidcock. L’Ollandais van der Poel ha pers 3:29 minutas ed è vegnì 28avel, il Brit Pidcock, l’anteriur campiun olimpic da Tokio ed actual campiun mundial da cross-country, ha schizunt pers 5:06 minutas ed uschia stuì sa cuntentar be cun il 36avel plaz.
Da l’equipa svizra è sulet Nino Schurter stà a la partenza. Grazia a ses buns resultats en questa stagiun ha el er la pli gronda schanza da survegnir in dals dus plazs da partenza che la Svizra ha da bun.
Lecomte gudogna tar las dunnas
Er en la cursa da test da las dunnas hai dà ina victoria franzosa. Loana Lecomte ha gudagnà suveran cun in avantatg da 39 secundas sin l’Austriaca Laura Stigger. Terza è vegnida la campiunessa mundiala Pauline Ferrand-Prévot. La cumpatriota da Lecomte ha pers 56 secundas.
Meglra svizra è stada Sina Frei sco 5avla cun in retard da 1:13 minuas. Persvadì ha er Ginia Caluori da Panaduz sco 15avla cun in retard da 3:36 minutas. Jolanda Neff ha terminà la cursa sco 22avla cun in retard da 4:49 minutas e l’actual pli ferma mountainbikera svizra, Alessandra Keller, ha pers 7:28 minutas ed è vegnida 30avla. Keller è dentant vegnida franada d'in defect cura ch'ella era a la testa da la cursa ensemen cun Loana Lecomte. Ina platta ha custà ad ella fitg bler temp.
Cumbattì per las medaglias als gieus olimpics da stad a Paris vegn dals 26 da fanadur fin ils 11 d’avust 2024.
