La Svizra cumenza bain e fa squitsch sin la «Squadra Azzurra». E tgi avess spetgà quai, la Naziunala svizra dominescha il gieu davent da l'entschatta e lascha pauc spazi a l'Italia. La paja vegn en la 37avla minuta. Suenter in pass da Vargas sajetta Freuler sper il goli talian Donnarumma ora e la Svizra va en avantatg cun 1:0.
Cun quai na sa cuntentan ils Svizzers betg. La segunda mesadad cumenza cun ina bumba. Vargas realisescha in belleza sajet sur Donnarumma ora – 2:0 per la Svizra en la 46avla minuta. Ed il squitsch dals Svizzers resta aut. Ils Talians emprovan bain dad anc chattar l'attatg, ma la Svizra stat segir ed attatgescha cuntinuadamain il gol talian. Il resultat resta, la Svizra batta sensaziunalmain il defensur da titel cun 2:0.
En il quartfinal frunta la Svizra sin il victur da la partida Engalterra – Slovachia. Quella decisiun croda dumengia saira. Il gieu da quartfinal vegn ad esser proxima sonda.
«Apokalipse ciao»
Uschia resumescha la gasetta da boulevard tudestga «Bild» il gieu. Ils Talians hajan mussà ina nauscha prestaziun, senza anim ed engaschi. Ils Svizzers perencunter hajan confermà la ferma prestaziun dal gieu cunter ils Tudestgs. Il pendant svizzer, il «Blick» resumescha il gieu cun «Spätestens seit dieser 'Serata magica' gibt es für diese Nati keine Grenzen mehr». «Le Matin Dimanche» scriva d'in epos remartgabel. La Svizra haja controllà il gieu suveran.
Tenor «La Gazzetta dello Sport» perda l'Italia sia fatscha. Ils Talians svoulian or dal turnier sin la pli schletta varianta. Suenter ina prerunda falombra n'hai dà nagin meglierament. Il «Corriere dello Sport» scriva d'ina squadra naziunala «senza chommas e senza orma», e d'in gieu taglian passiv. La prestaziun dals Svizzers vegn perencunter ludada.
Public viewing en il Vatican
Er en il Vatican vegn il gieu da la Svizra cunter l'Italia persequità plain tensiun. Circumdà da l'Italia guardan ils gardists svizzers il gieu en tricots da la Svizra.
Blera stenta per l'Italia
Duas giadas ha l'Italia fatg naufragi las ultimas giadas en la qualificaziun per il campiunadi mundial. Ed era la sort per il turnier actual n'è betg stada gloriusa per il quatterdubel champiun mundial. Cun tuttina blers puncts sco l'Ucraina ha l'equipa dumagnà be stretg la qualificaziun senza ir sur ils playoffs.
31 onns spetgar è avunda
La davosa victoria encunter il vischin dal sid giascha gia fitg lunsch enavos – pli precis 31 onns. Il success dad 1:0 en la qualificaziun dal campiunadi mundial il matg 1993 aveva mess il fundament per in toc istorgia svizra da ballape ed avert la porta per sa participar a la runda finala en ils Stadis Unids. Marc Hottiger ha sajettà la squadra dal coach Roy Hodgson a la victoria, pauc temp suenter è la Svizra sa qualifitgada per l'emprima giada dapi 28 onns puspè per in turnier grond.
Dapi lura hai dà en 11 inscunters tschintg terradas e sis paris.
