Siglir tar il cuntegn
Hirscher en acziun
Legenda: Hirscher è er ad Adelboden sissum il podest. Keystone

Naziunal/Internaziunal Marcel Hirscher gudogna ad Adelboden

Quai avant il Norvegiais Kristoffersen ed il Franzos Fanara.

Marcel Hirscher gudogna avant ses grond concurrent norvegiais Henrik Kristoffersen quai cun in avantatg da 71 tschientavels. Suenter l'emprim percurs manava anc Kristoffersen. Cun in fitg bun segund percurs ha l'Austriac dentant anc pudì volver la cursa. Uschia gudogna Hirscher ses quart slalom gigant al «Chuenisbärgli» e sia otg'avla cursa insumma ad Adelboden. Sin il terz plaz è il Franzos Thomas Fanara.

Dus Svizzers en ils top 10

Il skiunz grischun Gino Caviezel è stà sco 9avel il meglier Svizzer al «Chuenisbärgli». Gest suenter el è l'atlet da la Sutsilvania Marco Odermatt classà sco 10avel. El è stà impressiunà da la bun'atmosfera en l'arrivada dad Adelboden. Plinavant ha il grond dominatur Marcel Hirscher ludà Odermatt en ils pli auts tuns. Tenor l'Austriac pudessia il giuven da 21 onns daventar in dals gronds en il circus da skis.

Loïc Meillard è sa rangà sco 14avel.

Disfortuna per il Grischun Thomas Tumler

Betg uschè bain è la cursa ida per Thomas Tumler. L'atlet da Samignun è crudà ora en l'emprim percurs. Quai suenter ch'el aveva gia en la part sissum dal percurs fatg in grond sbagl. Tumler n'ha uschia anc betg pudì confermar ses bun resultat da Beaver Creek.

RR novitads 14:30

Artitgels legids il pli savens