La gronda schanza da far il pass sin il podest ha Nevin Galmarini en sia emprima cursa, il slalom gigant parallel, sia disciplina da parada. En questa disciplina è il sportist da 32 onns daventà avant bun in onn a Pyeongchang campiun olimpic – fin oz ses pli grond success da la carriera. Quatter onns avant, il 2014 a Sotschi, aveva el gudagnà argient en il slalom gigant parallel. Plinavant ha el er gia gudagnà ina medaglia a campiunadis mundials en questa disciplina, numnadamain quella da bronz il 2017 a Sierra Nevada.
In ulteriur chapitel
Dapi il grond triumf en la Corea dal Sid è sa midà bler en la vita da Galmarini. Per l'ina ha la medaglia dad aur olimpica midà ses status, per l’autra è il snowboardist engiadinais vegnì la stad passada bab da schumellins. A Park City vul Nevin Galmarini uss scriver in ulteriur chapitel en il snowboard alpin.
RR Actualitad 17:00
