La cuppa IBU è suenter la cuppa mundiala la segund'auta seria da biatlon, cumparegliabla cun la cuppa d'Europa en il sport da skis. A Lantsch vegn organisà per l'emprima giada insumma cursas da quella seria en Svizra. Uschia è quai in proxim pass per ina giada pudair organisar cursas da la cuppa mundiala.
Las grondas naziuns èn preschentas
Sco grondas naziuns da biatlon vegnan oravant tut la Germania, la Norvegia e la Russia a trametter in'entira roschada atletas ed atlets a Lantsch. Per la Svizra partan 14 atletas ed atlets, tranter auter er ils dus Rumantschs Aita Gasparin ed Eligius Tambornino.
Il venderdi cumenzan questas concurrenzas da la Cuppa IBU cun cursas da staffetta. La sonda datti duas cursas da sprint e la dumengia va tut a fin cun cursas da persecuziun.
RR actualitad 08:00