Claude Paschoud (29) e Fabian Ritzmann (22) n'èn omadus betg giugaders da spectacul. Na, els stattan omadus per lavur sincera sin il glatsch. Munta: els dattan fitg tenor il sistem e fan la lavur che vegn giavischada dal trenader finlandais, Jussi Tapola.
Actualmain giaja lur focus totalmain sin ils playoffs, il pli bel temp da la stagiun. En la seria da quartfinal frunta il SC Berna sin Zug.
Per RTR han els fatg in pitschen gir tras l'intern da la «PostFinance Arena», il pli grond stadion da hockey en Svizra.
Fabian Ritzmann in punct fix en l'equipa
Il giugader da Scuol è en sia segunda stagiun tar l'SCB. Gia la stagiun passada è el stà in giugader da tschep ed ha dà mintga gieu. Questa stagiun ha el fatg il proxim pass ed è il center da la quarta lingia. Là porta el - quai è sia incumbensa - fitg bler energia sin il glatsch. Radund 10 minutas per gieu è Ritzmann, per regla, en acziun.
Jau emprov segir en il futur da pudair dar pli offensiv.
Cun 22 onns è Ritzmann anc in giuven giugader. E cler ch'el haja anc ina massa potenzial da sa meglierar. El declera ch'el saja pront per il proxim svilup, spezialmain en l'offensiva vul el en l'avegnir anc dar pli ferm. E ses proxims onns da la carriera vesa el er a Berna. Sin sco er dasper il glatsch sa senta el bain en la chapitala svizra. Ses contract va anc fin la stagiun 2025/2026.
Claude Paschoud cumbatta per ses temp sin il glatsch
Suenter var 350 gieus per il HCD ha Paschoud tschertgà la stad passada ina nova sfida, bandunà sia patria Tavau e chattà quella tar l'SC Berna. En la chapitala svizra sto el cumbatter per ses temp sin il glatsch. Cun ses gieu dir e disciplinà en la defensiun è el dentant vegnì da fitgar pe en l'equipa da l'SCB. In fatg è dentant er ch'il defensur da 29 onns sto cumbatter per sias minutas sin il glatsch. Uschia ha el stuì guardar singuls gieus davent da la tribuna.
Il pli impurant è ch'jau sun saun e poss dar hockey.
Claude Paschoud è dentant simplamain cuntent ch'el po dar hockey sin glatsch senza effects secundars. Il november 2018 aveva el survegnì in puck en l'ureglia ed ha silsuenter plirs onns gì da cumbatter cun las consequenzas d'ina squassada dal tscharvè. Dapi la stagiun 2022/2023 po el uss puspè giugar senza mals. Per el saja quai il pli impurtant.
«Ti u jau»
Sco hockeyans en la medema equipa passentan Claude Paschoud e Fabian Ritzmann automaticamain bler temp ensemen. Natiralmain sin il glatsch, dentant er en gardaroba. Ma quant bain enconuschan els in l'auter? E tge maletg han els vicendaivlamain? Be tant, els discurran tudestg in cun l'auter. Claude Paschoud è numnadamain creschì si a Tavau en ravugl tudestg.
