Decisiun gia en l'emprim terz
Per la differenza ha l’equipa da Cuira - che vegn trenada dapi intginas emnas dals dus frars en anteriurs stars da hockey en Svizra, Reto e Jan von Arx - procurà gia en l’emprim terz. Suenter 20 minutas manava Cuira numnadamain gia cun 3:0. L’emprima duscha fraida per Arosa hai dà gia en la segunda minuta cura che Cedric Sieber ha tuc al 1:0. Be 7 minutas pli tard ha Luca Infanger tuc al 2:0 ed avant che l’emprim terz è i a fin ha il topscorer da Cuira, Mischa Bleiker, augmentà al 3:0.
A partir dal segund terz ha er l’EHC Arosa chattà la via en il gieu. Cun in gol da powerplay en la 28avla minuta ha Alain Bahar pudì scursanir al 1:3. Per dapli n’hai dentant betg tanschì en quest emprim derbi da la stagiun per Arosa, e quai anc avant ils fans da chasa.
Equipas grischunas sa movan enturn il stritg
Malgrà questa victoria resta l’EHC Cuira sin il 9avel plaz ed uschia sut il stritg da la tabella. L’EHC Arosa ch’ha tras questa terrada manchentà la schanza da restar sin ils chaltgogns a las equipas a la testa sa chatta uss da nov sin il 7avel plaz cun 2 puncts reserva sin ils rivals da Cuira.
Gia mesemna proxima, ils 3 da november èn Cuira ed Arosa puspè en acziun. L’EHC Arosa frunta ordaifer sin Hockey Huttwil e l’EHC Cuira dat ordaifer encunter l’EHC Thun.