Maraton da skis engiadinais - Furger batta Cologna tar sia derniera

Impressiuns dal Maraton da skis engiadinais 2022

Ils pli sperts umens:

1. Roman Furger 1:35.59,5
2. Dario Cologna +1,7 sec.
3. Tom Mancini (Frantscha) +2,7 sec.
4. Jonas Baumann +4,0 sec.
5. Jean-Marc Gaillard (Frantscha) +6,1 sec.

Reacziuns dals victurs

Puspè stat Roman Furger sisum il podest dal Maraton da skis engiadinais. Per l'Uranais da 32 onns è quai la quarta victoria. El ha uschia er impedì che Dario Cologna ha triumfà per la 5avla giada al maraton da Malögia a S-chanf. Il Jauer è ids la davosa giada a la partenza dal Maraton da skis engiadinais sco sportist professiunal. En duas emnas terminescha Cologna lura definitivamain sia carriera als campiunadis svizzers da passlung a Zweisimmen en il chantun Berna.

Las pli spertas dunnas:

1. Nadja Kälin 1:46.31,1
2. Céline Chopard Lallier (Frantscha) +1,8 sec.
3. Enora Latuillière (Frantscha) +4,0 sec.
4. Elisa Brocard (Frantscha) +8,3 sec.
5. Seraina Boner +1.50,7 minutas

Premiera per Nadja Kälin

Er tar las dunnas hai dà ina victoria svizra. Nadja Kälin ch'ha pir 20 onns ha gudagnà a sia cursa da chasa. Ella ha procurà per la differenza encunter la concurrenza franzosa sin il davos kilometer. Nadja Kälin da San Murezzan ha uschia procurà per la terza victoria svizra en seria. Il 2019 aveva Nathalie von Siebenthal gudagnà, l'onn avant Nadine Fähndrich.

Rangaziun umens e dunnas

Cundiziuns perfetgas

Bun 11'400 persunas èn sa participadas da bell'aura e bunas cundiziuns a la 52avla ediziun dal Maraton da skis engiadinais. Quai suenter che la cursa populara n'ha betg gì lieu ils davos dus onns pervia da la pandemia da corona.

Gia baud han ils organisaturs dal Maraton da skis engiadinais concepì variantas co evitar dad avair ina gronda massa da glieud a la partenza. Uschia è naschida l’idea da laschar partir ils passa 10'000 curridurs e curriduras en undas per la cursa. Quai è capità cun 29 differentas undas entaifer 1 ura e 28 minutas.

Tut en tut èn 40 naziuns stadas a la partenza. Bun 80% da tut las curridras ed ils curriders èn stads svizzers. Radund 20% a la partenza eran dunnas. Era blers e bleras aspectaturas han chattà la via agl ur da la loipa dal Maraton da skis engiadinais. Sut quels perfin in u l'auter prominent.

Cun Anna Tina Flepp al maraton

Ina da las partizipantas è Anna Tina Flepp stada. Pervia da la pandemia è sia premiera sa retarda, il 2022 finalmain èsi lura reussì. Suenter 3 uras e 20 minutas è ella arrivada a S-chanf, surlevgiada cunquai che las cundiziuns èn stadas pli pretensiusas che spetgà.

RTR ha accumpagnà

Istorgias ed anecdotas cun Gian Gilli

La cursa en survista: