Var 200 lutgaders da l’entira Svizra dal Nordost, pia dals chantuns Appenzell, Glaruna, Grischun, San Galla, Schaffusa, Turgovia e Turitg, han cumbattì a Meilen per il titel dal retg da lutga da la Svizra dal Nordost.
Armon Orlik, in dals favurits, è partì bain en la dumengia. Suenter la quarta lutga era el, ensemen cun Schneider e Schlegel, avant. Suenter la 5avla lutga è il Grischun dentant crudà enavos e n'ha betg sa pudì qualifitgar per la lutga finala. Cun in pari en sia 6avla lutga cunter Voggensperger era er la speranza da pudair «ertar» la victoria davent. «Cunter Voggensberger hai jau cumenzà cun la tenuta ch'jau n'hai nagut pli da perder. El è dentant sa defendì fitg bain. A mai ha lura mancà la davosa consequenza per gudagnar», ha ditg Orlik suenter la lutga.
Suenter sis lutgas ha el gì total 57,50 puncts, quai che basta per in segund rang, ensemen cun Domenic Schneider. Orlik è tuttina stà cuntent suenter la lutga. «Jau sun fitg cuntent. Jau hai segir pudì cumenzar fitg bun la bun'ura. Il suentermezdi hai mancà in pau per la lutga finala», ha ditg Orlik.
En la lutga finala ha Werner Schlegel battì suenter 11 minutas a Schneider. Quel aveva bain cumenzà ferm e dominant, Schlegel pudeva dentant bain defender.
Samuel Gyger – che valeva er sco in dals favurits – n'ha betg chattà ses ritem en questa festa. Dals emprims quatter duels ha el fatg dus pari. Uschia era el gia baud or da la cursa per il titel.
Orlik il leader, Müller il giuvenot
La delegaziun grischuna ha fatg il viadi cun quattordesch lutgaders a la festa da la Svizra dal Nordost NOS. Sper il meglier lutgader grischun, Armon Orlik, era la lutga segira er speziala per il pli giuven: Josias Müller da Ziran. L’onn 2015 aveva Müller cumenzà cun il sport da lutga, sco emprim da la famiglia. Dapi lura vala el sco ina da las grondas speranzas da lutga grischunas. Josias Müller ha gudagnà durant questa stagiun ses emprim cranz tar la festa da lutga Glarunaisa – Grischuna a Glaruna. In mais pli tard ha el confermà questa prestaziun cun gudagnar in cranz er tar la festa Grischuna – Glarunaisa a Tavau.
