Premiera tar la lutga da la Schwägalp: anc mai han dus frars cumbatti en la lutga finala per il titel. Ed anc mai ha in lutgader gudagnà ses emprim cranz insumma tar la festa al pe dal Säntis. Exact quai e dentant gartegià a Mario Schneider. Il frar vegl da Domenic Schneider ha bittà a ses frar en il resgim e festivescha uschia sin la Schwägalp la pli gronda victoria da sia carriera.
Totalmain be 14 cranzs tar la festa da muntogna da la Schwägalp
Ils lutgaders da la federaziun da la Svizra dal Nordost NOS eran ils pli ferms. Dals 14 cranzs ch'ins ha pudì gudagnar tar la festa da lutga han els gudogna ses. Ils auters otg cranzs han osps dad autras federaziuns gudagnà. Il meglier dals trais lutgaders grischuns ch’eran da la partida tar la lutga è stà Christian Biäsch da Tavau. El terminescha la lutga sin plazza otg e manchenta il cranz mo per in quart punct. Marc Jörger da Domat è vegni 20avel ed il giuven Andreas Wagner da Landquart 21avel.
Armon Orlik ha stuì dar forfait
Da la partida tranter ils 114 lutgaders ch’èn stads da vesair en il resgim da la lutga da la Schwägalp èn era stads 24 lutgaders cun cranz federal. Paucs dis avant l’emprova generala en vista a la festa da lutga dad Unspunnen, ha il meglier lutgader grischun, Armon Orlik dentant dà forfait. Dapi la lutga sin il Brünig ha Orlik in problem cun il dies. El n'ha vulì ristgar nagut ed ha perquai dat giu sia participaziun a la lutga al pe dal Säntis. Perquai èn trais auters lutgaders grischuns da la partida. Christian Biäsch da Tavau ch’è era sa qualifitgà per la festa da lutga dad Unspunnen, era Marc Jörger da Domat è da la partida, ed il giuven Andreas Wagner.